މި ބިލު ބަލައިގަތުމަށް 51 މެންބަރުން ވޯޓު ދިން އިރު، ހަތަރު މެންބަރުން ވަނީ ދެކޮޅަށް ވޯޓު ދީފަ އެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ އިނގުރައިދޫ ދާއިރާގެ މެންބަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާހެވެ. މި ބިލު މިހާރު ވަނީ ދިރާސާ ކުރުމަށް މަޖިލީހުގެ މާލިއްޔަތު ކޮމިޓީއަށް ފޮނުވާފަ އެވެ.
މި ބިލުގައިވާ ގޮތުން ރާއްޖޭގައި ކުރެވޭ ހުރިހާ މުއާމަލާތްތަކެއް ހިންގަންވާނީ ރުފިޔާއިންނެވެ. އަދި ބޭރު ފައިސާއިން އާމްދަނީ ލިބޭ ވިޔަފާރިތަކުގެ ތެރެއިން ޓޫރިޒަމް ދާއިރާގެ ވިޔަފާރިތަކާއި، މާލީ އިދާރާތައް ފިޔަވައި އެހެން ވިޔަފާރިއަކުން އަހަރަކު މަދުވެގެން 15 މިލިއަން ޑޮލަރު ލިބޭ ވިޔަފާރިތަކުން ބޭރު ފައިސާއިން ލިބޭ އާމްދަނީ ރާއްޖޭގެ ބޭންކެއްގައި ހުންނަ އެކައުންޓަކަށް ޖަމާކުރަންޖެހޭނެ އެވެ.
ރިސޯޓުތަކުން އެތަންތަނަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު، ނުވަތަ ވިޔަފާރިއަކަށް އެ މަހަކަށް ލިބޭ އާމްދަނީގެ 20 ޕަސަންޓު މާރުކުރެވިދާނެ އެވެ. އަދި ދެވަނަ ކެޓަގަރީގައި ހިމެނޭ ތަންތަނުން މަހެއްގެ މައްޗަށް ކޮންމެ ޓޫރިސްޓެއްގެ ބޮލަކަށް 25 ޑޮލަރު ނުވަތަ އެތަނަކަށް ލިބޭ އާމްދަނީގެ 20 ޕަސަންޓު މާރުކުރަން ޖެހޭނެ އެވެ.
