ހޮލިވުޑް ރިޕޯޓަރު އިންޑިއާއަށް ދިން ހާއްސަ އިންޓަވިއުއެއްގައި ކަރީނާ ބުނީ، 180 ކްރޯރު ރުފިޔާގެ ބަޖެޓެއްގައި ތައްޔާރުކުރެވުނު މި ފިލްމު ވިއްކުމުން ލިބުނީ އެންމެ 61 ކްރޯރު ރުފިޔާ ކަމަށެވެ. މި ފިލްމަކީ ކޮވިޑް-19 ގެ ބަލިމަޑުކަމުގެ ތެރޭގައި ވަރަށް ގިނަ ގޮންޖެހުންތަކާ ކުރިމަތިލައިގެން ނިންމާލެވުނު މަސައްކަތެއް ކަމަށްވެސް އޭނާ ފާހަގަކުރިއެވެ.
އާމިރުހާން އަށް ދިމާވެފައިވާ ދެރަ ހާލަތު ފެނުމުން އޭނާއަށް ފެންކަޅިވެ ރޮވުނުކަމަށް ވެސް ކަރީނާ ބުންޏެވެ.
ކަރީނާ އިތުރަށް ހާމަކުރެއްވި ގޮތުގައި، ފިލްމު ރިލީޒްވުމަށްފަހު އާމިރު ހާން އޭނާއާ ބައްދަލުކޮށް، ވަރަށް ހިތާމަވެރި ގޮތަކަށް "ފިލްމު ކާމިޔާބު ނުވިޔަސް އަދިވެސް އަހަރެންނާ ވާހަކަދައްކާނެތޯ" ސުވާލުކުރެއްވިކަމަށެވެ.
މި ވާހަކަ ޝަބާނާ އަޒްމީ، ރާޖްކުމާރު ރާއޯ އަދި ވިކީ ކައުޝަލް ފަދަ ތަރިންނާ ހިއްސާކުރެވުނު ވަގުތު، އެންމެންވެސް އާމިރުގެ މި ހާލަތާމެދު ވަރަށް ބޮޑަށް ކަންބޮޑުވިކަމަށް ކަރީނާ ބުންޏެވެ.
