
ޗީފް ޖުޑީޝަލް އެޑްމިނިސްޓްރޭޓަރުގެ މަގާމަށް މީހަކު ހޯދުމަށް މިދިޔަ ސެޕްޓެމްބަރު މަހުވެސް ހުޅުވާލިއެވެ. އެ ފަހަރުގެ އިއުލާނަށް އިޖާބަދީ، ކުރިމަތިލީ މީހުންނާ އިންޓަވިޔުވެސް ކުރުމަށް ފަހު މީހަކު ނުނަގައި އަނެއްކާވެސް ޖޭއެސްސީން އެ މަގާމަށް ހުޅުވާލީއެވެ.
ޖޭއެސްސީން ބުނީ ޗީފް ޖުޑީޝަލް އެޑްމިނިސްޓްރޭޓަރު މަގާމަށް ކުރިމަތިލުމުގެ ފުރުސަތު މިމަހުގެ 23 ވާ ހޯމަ ދުވަހުގެ ހެނދުނު 10:00 ޖެހުމާހަމައަށް ހުޅުވާލާފައިވާ ކަމަށެވެ. ޗީފް ޖުޑީޝަލް އެޑްމިނިސްޓްރޭޓަރުގެ މަގާމުގެ ދައުރަކީ ފަސް އަހަރުއެވެ. މި މަގާމަށް އައްޔަންކުރާ މީހެއްގެ ޖުމްލަ މުސާރައަކީ 47،500 އެވެ.
މި މަގާމަށް ކުރިމަތިލާ މީހެއްގެ ޝަރުތުތަކުގެ ތެރޭގައި އިދާރީ ހިންގުމުގެ ނުވަތަ ގާނޫނީ ދާއިރާއިން ފުރަތަމަ ޑިގްރީ ހާސިލްކޮށްފައިވުމާއި އިދާރީ ހިންގުމުގެ ނުވަތަ ގާނޫނީ ދާއިރާއިން 10 އަހަރުގެ ތަޖުރިބާ ލިބިފައިވުން ހިމެނެއެވެ.
ޗީފް ޖުޑީޝަލް އެޑްމިނިސްޓްރޭޓަރު މަގާމުގައި ކުރިން ހުންނެވި އައިޝަތު ރިޒްނާ ވަނީ އޭނާއާ ގުޅޭ މައްސަލަތަކެއް ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަން ފެށުމާއެކު މަގާމުން އިސްތިއުފާ ދެއްވާފައެވެ.
ކުރިން ޑީޖޭއޭގެ ޗީފް ޖުޑީޝަލް އެޑްމިނިސްޓްރޭޓަރުގެ ގޮތުގައި ހުންނެވި ރިޒްނާއާ ގުޅޭ މައްސަލަތަކެއް ޖޭއެސްސީ އިން ބަލަން ފެށިނަމަވެސް އެކަމުގެ ތަފްސީލެއް ޑީޖޭއޭއިން ހާމަ ނުކުރެއެވެ. އެނގިފައިވާ ގޮތުގައި ރިޒްނާއާ ގުޅޭ ގޮތުން އެ ކޮމިޝަނުން ބަލަން ފެށީ ފަނޑިޔާރުންގެ ހެލްތު އިންޝުއަރެންސްއާ ގުޅޭ މައްސަލައަކާއި މުވައްޒަފުން ނެގުމުގައި އަމަލުކޮށްފައިވާ ގޮތުގެ މައްސަލަތަކެކެވެ.