ސަރުކާރުން ޓެކްސީ ކުރަން އުޅޭތީ އެކަމާއި ދެކޮޅު ހެދުމުގެ ގޮތުން ޓެކްސީ ޑްރައިވަރުން އިއްޔެ ހަވީރާ ރޭ ވަނީ މުޒާހަރާކޮށްފައެވެ. އެގޮތުން ޓެކްސީތައް އަތުރާ ހުޅުމާލެ ފަޅިން ބްރިޖަށް އަރާ ހައިވޭ ވަނީ ބަންދުކޮށްލިއެވެ. މި މުޒާހަރާއާއި ގުޅިގެން ތިން މީހަކު ފުލުހުން ވަނީ ހައްޔަރުކޮށްފައެވެ. އަދި ހައިވޭގައި އެތެރި ޓެކްސީތައް ފުލުހުން ވަނީ ޓޯކޮށްފައެވެ.
މިކަމާއި ގުޅިގެން ދަ ޑިމޮކްރެޓްސް އިން ނެރުނު ބަޔާނެއްގައި ބުނީ ޓެކްސީ ދުއްވާ ފަރާތްތަކުން އިހްތިޖާޖުކުރުމާއިއެކު ސަރުކާރަށް ތަކުރާރުކޮށް އިލްތިމާސްކޮށް ގޮވާލަމުންދާ ގޮވާލުންތަކަށް ސަރުކާރުން ބީރު ކަންފަތެއްދީ ގޮންޖަހަމުންދާ ދިޔުން ބަލައި ނުގަނެ އެކަން އެޕާޓިން ކުށްވެރިކުރާކަމަށެވެ. އަދި ޓެކްސީ ޑްރައިވަރުން އިއްޔެ ހަވީރު ކުރި އިހްތިޖާޖަކީ އެ ފަރާތްތަކުގައި އާމްދަނީއާ ދިރިއުޅުމާއި ގުޅިފައިވާ ސީރިއަސް މައްސަލައަކާއި ގުޅިގެން ކުރިކަމެއްކަމަށް ގަބޫލުކުރާކަމަށްވެސް ޑިމޮކްރެޓްސްގެ ބަޔާނުގައިވެއެވެ.
އާއްމަދަނީ ހޯދުމަށް އާއްމު ފަރާތަކުން ދޭ ހިދުމަތްތަކުގެ ތެރެއަށް ސަރުކާރުން ވަންނަމުންގޮސް އެންމެފަހުން ސަރުކާރުން ތެކްސީ ކުރަން ފެށުމަކީ ޓްކްސީ ހިދުމަތް މިހާތަނަށް ފޯރުކޮށްދެމުން ގެންދިޔަ ޓެކްސީ ސެންޓަރުތަކާއި ޑްރައިވަރުންނަށް އިންތިހާއަށް ގެއްލުންވެ އެ ފަރާތްތަކުގެ އާމްދަނީ ހުއްޓިގެން ދާނެކަމެއްކަމަށްވެސް ޑިމޮކްރެޓްސް އިން ނެރުނު ބަޔާނުގައިވެއެވެ.
ޑިމޮކްރެޓްސް އިން ވަނީ ސަރުކާރުން ޓެކްސީ ޑްރައިވަރުންގެ ކަންބޮޑުވުންތަކުގެ އަޑުއެހުމަށާއި ސަރުކާރުން ޓެކްސީކުރަން އުޅޭ އުޅުން މިހާރުން މިހާރަށް ހުއްޓާލުމަށް ސަރުކާރަށް ގޮވާލައިފައެވެ.
