2034 ވަނަ އަހަރުގެ ވޯލްޑްކަޕް، ސައުދީގައި ބާއްވަން ނިންމައި އެކަން އިއުލާން ކުރީ ފީފާއިން ބުދަ ދުވަހުގެ ރޭ އޮތް ކޮންގްރެސްގައެވެ. ސައުދީން ބިޑު ކާމިޔާބުކުރީ ވާދަވެރިކަމެއް ނެތިއެވެ. އެކަމަކު ސައުދީގެ ބިޑަށް މީގެ ކުރިން ދުވަހަކުވެސް އެއްވެސް ބިޑަކަށް ނުލިބޭ ވަރަށް ޕޮއިންޓް ލިބިފައިވެއެވެ.
ސައޫދީ ވެގެންދާނީ ވޯލްޑް ކަޕް ބާއްވާ އަރަބި ތިން ވަނަ ގައުމަށެވެ. ފުރަތަމަ ގައުމަކީ 2022 ވަނަ އަހަރުގެ ވޯލްޑް ކަޕް ބޭއްވި ގަތަރެވެ. އަދި ސައޫދީ ވެގެންދާނީ ވޯލްޑް ކަޕް ބާއްވާ އިސްލާމީ ދުނިޔޭގެ ތިން ވަނަ ގައުމަށެވެ. ގަތަރުން ފުރަތަމަ ހޯދި އެ ޝަރަފް ދެ ވަނަ އަށް ހޯދާނީ 2030 ގެ މުބާރާތުގެ އެއް ހޯސްޓް މޮރޮކޯ އެވެ.
ސައުދީ އަރަބިއްޔާއިން 2034 ވަނަ އަހަރުގެ ވޯލްޑް ކަޕް ބާއްވަން ކުރާ މަސައްކަތުގެ ތެރެއިން 11 ދަނޑު އެޅުމުގެ ޕްލޭންވަނީ ހަދާފައެވެ. ސައުދީން ޕްލޭންކޮށްފައިވާ އާ 11 ދަނޑުގެ ތެރެއިން އަށް ސްޓޭޑިއަމް ހުންނާނީ ވެރިރަށް ރިޔާޒުގައެވެ. އޭގެ ތެރޭގައި 92،760 މީހުންގެ ޖާގައިގެ ކިންގް ސަލްމާން އިންޓަނޭޝަނަލް ސްޓޭޑިއަމް ހިމެނޭއިރު، އެ ދަނޑުގައި ވޯލްޑްކަޕް ހުޅުވާ މެޗާއި ފައިނަލް ކުޅޭނެ އެވެ.
ސައޫދީގެ ބިޑު ފޮތުގައިވާ ގޮތުން މުބާރާތް ބާއްވާނީ ފަސް ސިޓީއެއްގަ އެވެ. އެއީ ވެރިރަށް ރިޔާދް، ޖިއްދާ، އަލް ޚޮބަރް، އަބްހާ، އަދި ނައޫމް އެވެ. މުބާރާތް ކުރިއަށް ގެންދާނީ 15 ސްޓޭޑިއަމެއްގައި ކަމަށް ވެސް އޭގައި ވެ އެވެ.
