މަޖިލީހުގެ ޖަލްސާގައި މި މައްސަލައަށް ބަހުސްކުރުމާމެދު ވޯޓަށް އެހުމުން ވޯޓުގައި ބައިވެރިވި 71 މެންބަރުން ވެސް ވޯޓު ދިނީ މައްސަލަ ބަލައިގަނެ ބަހުސްކުރުމަށެވެ. މައްސަލަ ބަލައިގަތުމަށް ވޯޓުދެއްވި ޕީއެންސީގެ މެންބަރުންނަށާއި ސަރުކާރަށް ތާއީދުކުރާ މެންބަރުންނަށް މައުރޫފު ވަނީ ޝުކުރު އަދާކޮށްފަ އެވެ.
މި މައްސަލާގައި ފާހަގަކޮށްފައިވަނީ މިދިޔަ ހަފުތާ ރައީސް މުހައްމަދު މުއިއްޒު އަރި އަތޮޅާއި މާލެ އަތޮޅުގެ ރަށްރަށަށް ކުރެއްވި ދަތުރުގެ ތެރެއިން ބޭއްވި ޖަލްސާއެއްގައި ގުއާން ކިޔެވިއިރު ލައިވް ކުރި ވީޑިއޯއިން ތަންކޮޅެއް އުނިކުރި ކަމަށް ބުނާ މައްސަލަ އެވެ. މިކަމާ ގުޅިގެން ސޯޝަލް މީޑިއާގައި ފާޑުކިޔުން އިތުރުވުމާ ގުޅިގެން ޕީއެސްއެމް އިން ވަނީ އެ ލައިވް ސްޓްރީމް ހިމެނޭ ސޯޝަލް މީޑިއާ ޕޯސްޓުތައް ޑިލީޓްކޮށްފަ އެވެ.
މައުރޫފު ހުށަހެޅި މައްސަލާގައި ބުނެފައިވަނީ، ގުއާނުގެ އާޔަތްތަކަށް ބަދަލުގެނެސް ދައުލަތުގެ މީޑިއާގެ ޗެނަލްތަކުން ދައްކަމުން ދާކަން ފާހަގަކުރެވިފައިވާ ކަމަށާއި، އެ ކަމަކީ އިސްލާމް ދީނުގެ އެންމެ މަތިވެރި ފޮތް އަދި މާތް ރަސްކަލާންގެ ކަލާންފުޅަށް އިހާނެތިކޮށް ހިތައި، އެއަށް ގަސްތުގައި ބަދަލު ގެނެސް، އާޔަތްތަކުގެ މާނަ އޮޅުވައިލުމަށް ކުރަމުންދާ ނުރައްކާތެރި ކަމެއް ކަމަށެވެ.
