މިއަދު ބޭއްވި ތިންވަނަ ދައުރުގެ ފަހު ޖަލްސާ ނިންމަވާލައްވަމުން މަޖިލީހުގެ ރައީސް އަބްދުލްރަހީމް އަބްދުﷲ ވިދާޅުވީ ތިންވަނަ ދައުރުގައި 20 ބިލާއި އެއް ގަރާރާއި ސަރުކާރުން ހުށަހެޅި 13 މައްސަލަ އާއި ރިޔާސަތުން ހުށަހެޅި ފަސް މައްސަލައަކާއި، ހަތަރު ކުއްލި މައްސަލައެއްގެ އިތުރުން އެހެނިހެން މައްސަލަތަކާއި ގުޅޭ 7 ރިޕޯޓެއްގެ މަސައްކަތް ނިންމާފައިވާ ކަމަށެވެ.
މަޖިލީހުގެ ގަވާއިދު ބުނާ ގޮތުން އަހަރުގެ ފުރަތަމަ ދައުރު ކުރިއަށް ދާނީ ފެބްރުއަރީ މަހުން ފެށިގެން އޭޕްރީލް މަހުގެ ނިޔަލަށެވެ. ދެވަނަ ދައުރު ހިނގާނީ ޖޫން މަހުގެ ފުރަތަމަ ދުވަހުން ފެށިގެން އޮގަސްޓް މަހުގެ ނިޔަލަށެވެ. ތިންވަނަ ދައުރު ހިނގާނީ އޮކްޓޯބަރު މަހުގެ ފުރަތަމަ ދުވަހުން ފެށިގެން ނޮވެމްބަރުގެ ނިޔަލަށެވެ. ނަމަވެސް މަޖިލީހުގައި ނުނިމި މަސައްކަތްތަކެއް ހުރުމުން ތިންވަނަ ދައުރު ވަނީ ދިގު ދަންމާލާފަ އެވެ.
މި ދައުރުގެ ތެރޭގައި މަޖިލީހުގައި ވަނީ 20 ބިލެއްގެ މައްސައްކަތް އެއްކޮށް ނިންމާލާފަ އެވެ. މީގެ ތެރޭގައި ގައުމުގެ އިގްތިސާދާއި އިޖުތިމާއީ ކަންކަމާ ގުޅުންހުރި މުހިންމު ބިލުތައް ހިމެނެ އެވެ.
މަޖިލީހުން ފާސްކޮށްފައިވާ މުހިންމު ބައެއް ބިލުތައް
- ބޭރު ފައިސާއާ ބެހޭ ބިލު
- ކޮޕީރައިޓާއި އެއާގުޅޭ އެހެނިހެން ހައްގުތަކުގެ ގާނޫނަށް އިސްލާހު ގެނައުމުގެ ބިލު
- ދައުލަތުގެ ދަރަންޏާބެހޭ ބިލު
- ދައުލަތުގެ ފިސްކަލް ޒިންމާގެ ބިލު
- އާބަން ޑިވެލޮޕްމަންޓް ބިލު
- ގާނޫނުއަސާސީއަށް އިސްލާހު ގެނައުމުގެ ބިލު
- ސިޔާސީ ޕާޓީތަކުގެ ގާނޫނަށް އިސްލާހު ގެނައުމުގެ ބިލު
- ދުންފަތް ކޮންޓްރޯލް ކުރުމާބެހޭ ގާނޫނަށް އިސްލާހު ގެނައުމުގެ ބިލު
- ދިވެހިރާއްޖޭގެ އެކްސްޕޯޓް އިމްޕޯޓުގެ ގާނޫނަށް އިސްލާހު ގެނައުމުގެ ބިލު
- މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލު
- ދިވެހިރާއްޖޭގެ ޓޫރިޒަމާ ބެހޭ ގާނޫނަށް އިސްލާހު ގެނައުމުގެ ބިލު
- ދިވެހިރާއްޖޭގެ އެއާޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީ ނެގުމާބެހޭ ގާނޫނަށް އިސްލާހު ގެނައުމުގެ ބިލު
މީގެ އިތުރުން އަންނަ އަހަރަށް ލަފާ ކުރާ ބަޖެޓުވެސް ފާސްކޮށްފައިވަނީ މަޖިލީހުގެ މި ދައުރުގަ އެވެ. އެގޮތުން ޖުމްލަ 56.6 ބިލިޔަން ރުފިޔާގެ ބަޖެޓެއް ވަނީ ފާާސްކޮށްފައެވެ.
މި ދައުރުގައި މަޖިލީހުން ނިންމި ނިންމުންތަކަށް ބަލާއިރު، ގާނޫނުއަސާސީ އަށް ގެނައި ބަދަލުތައް ފާހަގަކޮށްލެވެ އެވެ. އެ ދުވަސް ތެރޭގައި ހުރިހާ މަސައްކަތެއް ނިންމައި، ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭނެ ހާލަތްތަކެއް ގާނޫނުއަސާސީ އަށް އިތުރުކުރި އެވެ.
ގިނަ ބައެއްގެ ފާޑުކިޔުން އަމާޒުވި އެ އިސްލާހު ބާތިލް ކުރަން ސުޕްރީމް ކޯޓަށް ގާނޫނީ ވަކީލު އަލީ ހުސެއިން ވަނީ ދުސްތޫރީ މައްސަލައެއް ހުށަހަޅައިފަ އެވެ. މި މައްސަލައަށް އެމްޑީޕީ އަދި ދަ ޑިމޮކްރެޓް އިން ވަނީ ތަދައްހުލްވެފަ އެވެ
