މަޖިލިސް ޖަލްސާގައި ވިލިމާލެ ދާއިރާގެ މެންބަރު މުހައްމަދު އިސްމާއީލް ދެއްކެވި ވާހަކަފުޅުގައި އެމްޑީޕީގެ މެންބަރުންނަކީ އިސްލާމްދީން ގަބޫލުނުކުރާ ބައެއް ކަމަށް ވިދާޅުވުމާ ގުޅިގެން ޝާހިދު ވިދާޅުވީ މިއީ ސިޔާސީ ގޮތުން ބަލިވާން ފެށުމުން އުފައްދާ ފިތުނައެއް ކަމަށެވެ.
ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ ގާނޫނުލް އުގޫބާތުގެ 124 ވަނަ މާއްދާގެ ދަށުން މުސްލިމަކު ކަނޑައެޅިގެން ކުފުރުގެ އަމަލެއް ނުކުރާހާ ހިނދަކު އެމީހަކީ މުރުތައްދުވެފައިވާ މީހެއްގެ ގޮތުގައި ސިފަކުރުމަކީ ޖިނާއީ ކުށެއް ކަމަށެވެ.
މި މައްސަލަ މަޖިލީހުގެ އިމްތިޔާޒު އަދި ސުލޫކު ކޮމިޓީން ބަލައި އަވަސް ފިޔަވަޅު އެޅުމަށް ޝާހިދު ވަނީ ގޮވާލައްވާފައެވެ. އަދި ދިވެހި ރައްޔިތުންގެ ދީނީ އެއްބައިވަންތަކަން ނަގާލުމަށް މަސައްކަތްކުރުމާއި އެފަދަ ވާހަކަ ދެއްކުމަކީ ގާނޫނީ ގޮތުން މަނާ ކަމެއް ކަމަށްވެސް ވިދާޅުވިއެވެ.
