ރޭ ޓެކްސީ ޑްރައިވަރުން ކުރި މުޒާހަރާގައި ތިން މީހުން ހައްޔަރުކުރި ނަމަވެސް ބަންދުގެ މުއްދަތު ޖެހީ ދެ މީހަކަށެވެ.
ހުޅުމާލެ މެޖިސްޓްރޭޓް ކޯޓުން މިއަދު ބަންދު މުއްދަތު އިތުރުކޮށްދިނީ މުހައްމަދު ޝާމިން އާއި އަހުމަދު ޝަބީންގެ މައްޗަށެވެ. އެ ދެމީހުންގެ ބަންދު މުއްދަތު އިތުރުކޮށްދިނީ މުޖުތަމައުގެ ސަލާމަތަށް ނުރައްކާ ވެދާނެ ކަމަށް ބުނެއެވެ. ދެމީހުންގެ ބަންދަށްވެސް ކޯޓުން ވަނީ ފަސް ދުވަށް ޖަހާދީފައެވެ.
މި މައްސަލާގައި ދެން ހައްޔަރުކުރީ ހދ. ކުމުންދޫ/ ހޮލިޑޭވިލެޖް، އުމުރުން 36 އަހަރުގެ ނުއުމާން އަހުމަދުއެވެ. އޭނާ ވަނީ ޝަރުތުތަކާއެކު މިނިވަންކޮށްފައެވެ.
ހައްޔަރުކުރި ތިން ޑްރައިވަރުން. މުހައްމަދު ޝާމިން އާއި ނުއުމާން އަހުމަދު އަހުމަދު ޝަބީން އަދި
ހައްޔަރު ކުރި ޑްރައިވަރުންގެ ވަކީލެުންގެ ގޮތުގައި މަސައްކަތް ކުރަނީ އެމްޑީޕީގެ ގާނޫނީ ވަކީލުންގެ ޓީމެކެވެ. އެ ޓީމުން ބުނީ ބަންދު ޖެހި މައްސަލަ ހައިކޯޓުގައި އިސްތިއުނާފުކޮށްފައިވާކަމަށެވެ. ސަބަބެއްކަމަށް ބުނީ އެކަށީގެންވާ ވަރަށް ހެކި ނެތުމާއި ބަންދުގައި ބަހައްޓަން ޖެހޭ ސަބަބެއް ނެތުމެވެ.
ޓެކްސީ ޑްރައިވަރުން މުޒާހަރާކުރީ ސަރުކާރުން ޓެކްސީ ލައިނެއް ތައާރަފުކޮށް ޓެކްސީގެ ހިދުމަތް ދޭން މަސައްކަތް ކުރަން ފެށުމާ ގުޅިގެންނެވެ. މުޒާހަރާކުރި ޑްރައިވަރުން ރޭގެ ނުވަ ޖަހާއިރު ހުޅުމާލެ ނިރޮޅުމަގު ކޮޅުގައި ކާރުތައް ޕާކުކޮށް އެ މަގު ބަންދުކުރި އެވެ. އޭގެ ފަހުން ފުލުހުން އެ ސަރަހައްދު ކޮންޓްރޯލްކޮށް، 20 އަށްވުރެ ގިނަ ޓެކްސީ ޓޯކުރިއެވެ.
