މި ހިދުމަތް ރަސްމީކޮށް ފަށައިދެއްވީ ހެލްތު މިނިސްޓަރު އަބްދުﷲ ނާޒިމް އެވެ.
ހެލްތު މިނިސްޓަރު ވިދާޅުވީ އެމްއާރުއައިގެ ހިދުމަތް ގާއިމުކުރުމަށްފަހު، އެ ހޮސްޕިޓަލް ޓާޝަރީ ފެންވަރަށް ތަރައްގީކުރުމަށް ބޭނުންވާ އިތުރު ހިދުމަތްތައް ގާއިމުކުރުމުގެ މަސައްކަތް ވަރަށް އަވަހަށް ފެށޭނެ ކަމަށެވެ.
އުނގޫފާރު ހޮސްޕިޓަލުގައި ހަށިގަނޑުގެ ކޮންމެ ގުނަވަނަކަށް ދިމާވެފައިވާ ގެއްލުމެއްވެސް ބަލައިލެވޭ އެމްއާރުއައިގެ ހިދުމަތާއެކު ޕީއާރުޕީގެ ހިދުމަތްވެސް ވަނީ ފަށާފައެވެ. ޕްލޭޓްލެޓް ރިޗް ޕްލާޒްމާ، ޕީއާރުޕީގެ ހިދުމަތަކީ އިންސާނާގެ ހަށިގަނޑުގައި ހަލާކުވެފައި ހުންނަ ޓިޝޫތައް ރަނގަޅުކުރުމަށް ދެވޭ ފަރުވާގެ ހިދުމަތެކެވެ.
40 އަހަރު ވެފައިވާ އުނގޫފާރު ހޮސްޕިޓަލުގައި މިހާރު ވަނީ ގިނަ ހިދުމަތްތަކެއް ގާއިމުކޮށްފައެވެ. އެގޮތުން ހިތުގެ ބަލިތަކުގެ ފަރުވާއާއި މެމޯގްރަފީގެ ހިދުމަތާއި ސީޓީ ސްކޭންގެ ހިދުމަތް ހިމެނެއެވެ. އަދި ދަތުގެ ފަރުވާއާއި އީއެންޓީގެ ހިދުމަތް ޒަމާނީ ވަސީލަތްތަކާއެކު ވަނީ ފުޅާކޮށްފައެވެ.
