ރޭގެ މެޗުގެ ދެވަނަ ހާފުގެ ކުޅުން ފެށުނުތާ ކުޑައިރުކޮޅެއްގެ ތެރޭގައި ޔުނައިޓެޑްގެ ކީޕަރު އޮނާނާ އަށް ހެދުނު ގޯހެއްގެ ފައިދާ ނަގާ ޕްލަޒެންގެ މަތެޖް ވައިދްރާ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. ޔުނައިޓެޑަށް އެއްވަރުކޮށްދިން ލަނޑު މެޗުގެ 62 ވަނަ މިނިޓުގައި ކާމިޔާބު ކޮށްދީފައިވަނީ ރަސްމުސް ހޮއިލުންޑެވެ. އަދި މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައިވަނިކޮށް އޭނާ ވަނީ އިތުރު ލަނޑެއް ޖަހާ މި މެޗުން ޔުނައިޓެޑަށް ތިން ޕޮއިންޓް ކަށަވަރުކޮށްދީފަ އެވެ.
ޔުއެފާ ޔޫރޮޕާ ލީގުގައި ރޭ ޗެކް ރިޕަބްލިކުގެ ވިކްޓޯރިއާ ޕްލަޒެންއާ ދެކޮޅަށް ކުޅުނު މެޗުން ޔުނައިޓެޑު މޮޅުވީ ދެ ލަނޑު އެއް ލަނޑުންނެވެ. ޗެކް ރިޕަބްލިކްގެ ދޫސަން އެރީނާގައި ކުޅުނު މި މެޗު ޔުނައިޓެޑުން ކާމިޔާބުކުރުމާއެކު އެ ޓީމަށް ވަނީ މި މުބާރާތުގައި މިހާތަނަށް ކުޅުނު ހަ މެޗުން ލިބިފައިވާ 12 ޕޮއިންޓާއެކު ތާވަލުގެ ހަތްވަނައަށް އަރާފައެވެ.
ހަ މެޗުން ޕްލަޒެންއަށް ލިބިފައިވާ 9 ޕޮއިންޓާއެކު އެ ޓީމު އޮތީ 17 ވަނައިގައެވެ. އެއްވަނައިގައި އޮތް ލާޒިއޯއަށް ހަ މެޗުން ލިބިފައިވަނީ 16 ޕޮއިންޓެވެ.
