34 ރަށެއްގައި ފެނާއި ނަރުދާމާ ގާއިމުކުރުމުގެ މަޝްރޫއުގެ ދަށުން ދަނގެތީގެ ނަރުދަމާ ނިޒާމު ގާއިމުކުރުމުގެ މަސައްކަތް ފެށީ މިދިޔަ ސަރުކާރުންނެވެ. މި މަޝްރޫއަކީ އެގްޒިމް ބޭންކް އޮފް އިންޑިއާ އިން ދިން ދިން 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން ހިންގި މަޝްރޫއެކެވެ.
މި މަޝްރޫއުގެ މަސައްކަތް ނިންމާ ދިވެހި ސަރުކާރާއި ހަވާލުކުރީ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު މިދިޔަ އޮގަސްޓްމަހު ރާއްޖެއަށް ކުރެއްވި ރަސްމީ ދަތުރުފުޅުގެ ތެރޭގައެވެ.
ދަނގޭތީގެ ނަރުދަމާ ނިޒާމުގެ ހިދުމަތް ރައީސް ޑރ. މުއިއްޒު ރަސްމީކޮށް ފަށްޓަވާދެއްވީ މިހާރު އެމަނިކުފާނު އދ ގެ ބައެއް ރަށްތަކަށް ކުރައްވާ ދަތުރުފުޅުގެ ތެރެއިންނެވެ.
ދަނގެތީގެ ނަރުދަމާ ނިޒާމުގެ ހިދުމަތް ފެށުން
ދަނގެއްޗަށް މިއަދު ރައީސް ވަޑައިގެން އެރަށު ކައުންސިލާ ވަނީ ބައްދަލުކުރައްވާފައެވެ. މި ބައްދަވުމުގައި ކައުސިލުން ވަނީ އެރަށުގައި ޑޮލަރު އޭޓީއެމްއެއް ބަހައްޓާދޭން އެދިފައެވެ. ރައީސް ވަނީ ޑޮލަރު އޭ.ޓީ.އެމްގެ ކަންކަން ބައްލަވައި ދެއްވާނެކަމުގެ ޔަގީންކަން އެ ކައުންސިލަށް އަރުވާފައެވެ.
