ފުރަތަމަ ބުރުގައި ކުޅުނު ހުރިހާ މެޗަކުން މޮޅުވެ ދެވަނަ ބުރަށް ދިޔައ ފުވައްމުލަކަށް، ފުރަތަމަ ބުރުގައި ދެއްކި ޖާދޫ ދެވަނަ ބުރުގައި ދެއްކޭ ގޮތެއް ނުވިއެވެ. ފުރަތަމަ މެޗުން އެއްވަރުވިއިރު، ދެވަނަ މެޗުން ބަލިވީއެވެ. މާނައަކީ ދެ މެޗުން ކުރެ މެޗަކުން މޮޅުނުވެ، ކުއާޓާގެ ފުރުސަތު ނަސީބުގެ އަތްމައްޗަށް ދޫކޮށްލަން ޖެހުމެވެ.
މުބާރާތުގެ ގަވައިދު އޮތް ގޮތުން ދެ ޓީމު އެއްވަރުވުމުން ދެން ޖެހޭނީ ގުރުއަތު ލާށެވެ. ފުވައްމުލަކާއި ތިމަރަފުށިވެސް ގުރައިދޫ އަތުން ބަލިވެފައިވާއިރު، އެ ދެ ޓީމުގެ މެޗުވީ އެއްވަރެވެ. ގްރޫޕުން އެއްވަނައިގައި ގުރައިދޫ ކުއާޓާއަށް ދިޔައިރު، ދެވަނަ ކަނޑައަޅަން ޖެހޭނީ ގުރުއަތުންނެވެ. މިއަދު ގުރުއަތު ނަގާނެއެވެ.
ފުވައްމުލަކު ރޭ ގުރައިދޫ އަތުން ބަލިވީ އެއް ލަނޑު ސުން ލަނޑުންނެވެ. މެޗުގައި ފެނިގެންދިޔަ ހަމައެކަނި ލަނޑު ޖެހީ އަހުމަދު ޝުއޫން އެވެ.
