އަމިއްލަ ދަނޑުގައި ފުލަމްއާ ލިވަޕޫލް އެއްވަރުވީ ދެ ލަނޑު ދެ ލަނޑުންނެވެ. މި މެޗާއެކު އެންމެ ފަހުން ކުޅުނު ދެ މެޗުންވެސް ލިވަޕޫލްވީ އެއްވަރެވެ. މި ނަތީޖާތަކަށް ފަހު، ލިވަޕޫލުން ލީގުގެ ކުރީގައި އޮތީ ފަސް ޕޮއިންޓުގެ ލީޑަކާ އެކު އެވެ. އެއީ 15 މެޗުން 36 ޕޮއިންޓާ އެކު އެވެ. ދެ ވަނައިގައި އޮތް ޗެލްސީ އަށް 15 މެޗުން 31 ޕޮއިންޓް ލިބިފައިވެއެވެ. ތިން ވަނައިގައި އޮތް އާސެނަލަށް 16 މެޗުން ވަނީ 30 ޕޮއިންޓް ލިބިފަ އެވެ.
ރޭގެ މެޗުގައި ފުލަމް އިން އަންޑްރެއަސް ޕެރެއިރާގެ ގޯލުން ލީޑުނެގިއިރު، 16 ވަނަ މިނިޓްގައި، ލިވަޕޫލްގެ އެންޑީ ރޮބަޓްސަން އަށް ވަނީ ރަތް ކާޑު ދައްކާފައެވެ. އެހެންކަމުން މެޗުގެ ބޮޑު ބައެއް ލިވަޕޫލުން ކުޅުނީ އެއް ކުޅުންތެރިއަކު މަދުކޮށެވެ.
ލިވަޕޫލަށް އެއްވަރު ކޮށްދިނީ ދެ ވަނަ ހާފުގެ ކުރީކޮޅުގައި ކޯޑީ ގަކްޕޯއެވެ. އެކަމަކު ބަދަލަކަށް ކުޅެން އަރައި ރޮޑްރީގޯ މުނީޒް ވަނީ ފުލަމް އަށް އަލުން ލީޑުނަގައިދީފަ އެވެ. ލިވަޕޫލަށް ދެ ވަނަ ފަހަރަށް އެއްވަރުކޮށްދިން ގޯލު ޖެހީ ޑިއޯގޯ ޖޮޓާ އެވެ.
