އެމަނިކުފާނު މިހެން ވިދާޅުވީ އަރިއަތޮޅު ދެކުނުބުރީގެ ބައެއް ރަށްތަކަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ދަނގެއްޗަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޚު ދައްކަވަމުންނެވެ.
ރައީސް ޑރ މުއިއްޒު ވިދާޅުވީ އދ.ދަނގެއްޗަށް ދިމާވެފައިވާ ބޯހިޔާވަހިކަމުގެ ދަތިކަމަށް ހައްލު އޮތީ ބިން ހިއްކައިގެންކަމަށެވެ. އެހެންކަމުން ފުރުސަތު އޮތް މިންވަރަކުން 2025 ވަނަ އަހަރުގެ ތެރޭގައި އެ މަސައްކަތް ފައްޓަވާދެއްވާނެކަމަށާއި ނޫން ނަމަ 2026 ވަނަ އަހަރަކީ، އދ. ދަނގެތީގެ ފަޅުތެރެއިން 27 ހެކްޓަރުގެ ބިން ހިއްކާނެކަމަށް ރައީސް ވިދާޅުވިއެވެ. އަދި އެ މަސައްކަތާއި އެކު އެރަށުގައި ގޯތި ދޫކުރުމާއި ގެދޮރުވެރިކަމުގެ މަޝްރޫއު ހިންގަވާދެއްވާނެ ކަމުގެ ޔަޤީންކަންވެސް ރައީސްް ޑރ. މުއިއްޒު ވަނީ ދެއްވާފައެވެ.
ރައީސް ޑރ. މުއިއްޒު ދަނގެއްޗަށް ކުރެއްވި ޒިޔާރަތުގައި އެރަށު ރައްޔިތުންނާއި ބައްދަލުކުރައްވާ ވާހަކަ ދައްކަވަނީ
ދަނގެތީ ރައްޔިތުންނާއި ބައްދަލުކުރައްވާ ވާހަކަ ދައްކަވަމުން ރައީސް ޑރ. މުއިއްޒު ވަނީ އެރަށުގެ ރައްޔިތުންނަށް ކުރިމަތިވެފައިވާ އެތައް ތަކްލީފުތަކެއްގެ ތެރެއިންވެސް އެންމެ ބޮޑު މައްސަލައެއްގެ ގޮތުގައި ފާހަގަކުރެވޭ ބަނދަރުގެ ދަތިކަމުގެ މައްސަލަ ހައްލުކުރުމުގެ ޢަމަލީ މަސައްކަތް އަންނަ އަހަރު ފައްޓަވާނެކަމުގެ ފުރިހަމަ ޔަޤީންކަން ދެއްވާކަމަށް ވިދާޅުވެފައެވެ.
ބަނދަރު ތަރައްޤީ ކުރުމުގެ މަސައްކަތްތައް ކުރިއަށް ގެންދާނީ ރައްޔިތުންގެ ހުށަހެޅުންތައް ވީވަރަކުން ފުރިހަމަ ކުރެވޭ ފަދަ ގޮތަކަށް ކަމަށާއި، މަސައްކަތް ފަށާ ހިސާބުން އަހަރެއް ނުވަތަ ދޮޅު އަހަރުގެ ތެރޭގައި އެ މަސައްކަތްތައް މުޅިން ނިންމާލެވޭނެ ކަމުގެ ޔަޤީންކަންވެސް ރައީސް ޑރ. މުއިއްޒު ދެއްވިއެވެ.
