މި މައްސަލާގައި ހައްޔަރުކޮށް ދައުވާ އުފުލާފައި ވަނީ ގއ. މާމެންދޫ ގުލޭރަންމާގޭ އަހްމަދު ރަބީއުގެ މައްޗަށެވެ. މީނާގެ މައްޗަށް ދައުލަތުން އުފުލީ މަގުބޫލު ސަބަބެއް ނެތި، އާންމު ތަނެއްގައި ނުރައްކާތެރި ހަތިޔާރު ގެންގުޅުމުގެ ކުށުގެ ދައުވާއެވެ.
މި މައްސަލަައިގެ ދައުވާގައި ވަނީ މީނާ 2021 ވަނަ އަހަރުގެ އޮކްޓޫބަރު 29 ވަނަ ދުވަހު، މެންދުރުފަހު މާލޭ މުރަނގަމަގުގައި ހުންނަ ފޫޑޯސް ކައިރިން ކޯރާޑިއެއް ހިފައިގެން ބަޔަކު ފަހައި ދުވެފައިވާކަމަށެވެ.
މި މައްސަލާގައި މީނާ ހައްޔަރުކުރީ އޭގެ 11 ދުވަސް ފަހުންނެވެ. ފުލުހުން އޭނާ ހައްޔަރުކުރީ ތޫނު ހަތިޔާރު ބޭނުންކޮށްގެން މާރާމާރީ ހިންގަން އުޅޭކަމަށް ބުނެ އާއްމު ފަރާތަކުން ކުރި ރިޕޯޓަކާއި ގުޅިގެންނެވެ.
މި މައްސަލާގަައި ދައުލަތުން އުފުލި ދައުވާއަށް ޖަވާބު ދާރީވަމުން އެފަދަ އަމަލެއް ކޮށްފައި ނުވާނޭކަމަށް ބުނެ މީނާ ވަނީ ދައުވާއަށް އިންކާރުކޮށްފައެވެ. މީނާގެ މިކަން ކުރި ކަން ސާބިތުކޮށްދޭން ފުލުހުން ވަނީ ހާދިސާ ހިނގި ދުވަހުގެ ވީޑިއޯ ފުޓޭޖްތައް ހެކީގެ ގޮތުގައި ހުށައަޅާފައެވެ.
މައްސަލަ ނިންމާ ކްރިމިނަލް ކޯޓުން އިއްވި ހުކުމުގައި ވަނީ ފުލުހުން ހުށައެޅި ވީޑިއޯތަކުން ފެންނަނީ ދައުވާ ލިބޭ ރަބީއުކަން، ޝައްކެއް ނެތް މިންވަރަށް ސާބިތުކޮށްދެވިފައި ނުވާކަމަށެވެ. އެހެންކަމުން އޭނާގެ މައްޗަށް ކުށް ސާބިތުނުވާކަމަށް ކޯޓުން ވަނީ ނިންމާފައެވެ.
