ފުއާދު ތައުފީޤަށް ސަފީރުކަމުގެ ފަތްކޮޅު މިއަދު ވަނީ ރައީސް ޑރ. މުހައްމަދު މުއިއްޒު އަރުވާފައެވެ. ސަފީރުކަމަށް އައްޔަންކުރެއްވުމުގެ ކުރިން ފުއާދު ހުންނެވީ ފޮރިން މިނިސްޓްރީގެ އެމްބަސެޑާ އެޓް ލާޖުގެ މަގާމުގައެވެ.
އިލެކްޝަން ކޮމިޝަންގެ ރައީސްކަން ކުރެއްވި ފުއާދު ތައުފީގު ތައިލޭންޑް ސަފީރުކަމަށް އައްޔަންކުރަން ނަން ރައްޔިތުންގެ މަޖިލިހަށް ރައީސް ޑރ. މުހައްމަދު މުއިއްޒު ފޮނުއްވީ އޭނާގެ ދައުރު ފުރިހަމަވެ އެ ކޮމިޝަނުގެ މެމްބަރުކަމުން ވަކިވި ދުވަސް ނޫން އަނެއް ދުވަހުއެވެ.
އިލެކްޝަންސް ކޮމިޝަންގައި މެމްބަރުންގެ ތެރެއިން ކޮމިޝަންގައި އެންމެ ގިނަ ދުވަސްވީ އެއް މެމްބަރަަކީވެސް ފުއާފު ތައުފީގެވެ.
ފެހި ގާނޫނު އަސާސީ ގެ ދަށުން ފުރަތަމަ އެކުލަވާލި އިލެކްޝަންސް ކޮމިޝަންގެ މެމްބަރުކަންވެސް ފުއާދު ވަނީ ކުރައްވާފައެވެ. ފުއާދަކީ އޭރު ރާއްޖޭގައި އޮތް ހުރިހާ ސިޔާސީ ޕާޓީއަކުން ރުހިގެން އެފަހަރު ކޮމިޝަނަށް އައްޔަން ކުރި މެމްބަރެކެވެ.
ރާއްޖޭގެ ފުރަތަމަ ފަހަރަށް ބޭއްވި މަލްޓި ޕާޓީ ފުރަތަމަ ރިޔާސީ އިންތިހާބުގައި ފުއާދު ވަނީ ކޮމިޝަންގައި މުހިއްމު މަސައްކަތްތަކެއް ކުރައްވާފައެވެ.
2008 ވަނަ އަހަރުން ފެށިގެން 2014 ގެ ނިޔަލަށް ފުއާދު ވަނީ ކޮމިޝަންގެ މެމްބަރުކަން ކުރައްވާފައެވެ. 2013ގެ ރިޔާސީ އިންތިހާބާއި އެކު ސުޕްރީމްކޯޓުން ފުއާދުގެ މައްޗަށް އިއްވި ހުކުމާއި އެކު 2014 ވަނަ އަހަރު އޭނާ ވަނީ ކޮމިޝަނުން މަގާމުން ވަކިކޮށްފައެވެ.
އީސީގެ މެމްބަރު ކަމަށް ފަހުން ފުއާދު އައްޔަންކޮށްފައިވަނީ ރައީސް އިބްރާހިމް މުހައްމަދު ސާލިހްގެ ވެރިކަމުގައި 24 ނޮވެމްބަރު 2019ގައެވެ. އޭގެ ފަހުން މިހާރު ހުންނެވި ކޮމިޝަންގެ ރައީސްކަމަށް ފުއާދު އައްޔަންކުރެއްވީ 2021 ވަނަ އަހަރު އެވެ.
