މަރުވެފައިވާ ދެ މީހުންނަކީ މ. މަސްތާނުގެ އަލީ މުއާޒު (މުއާ) އާއި ގދ. ރަތަފަންދޫ ދިލްކުސާގޭ އަނަސް މުހައްމަދު (އަނަސް) އެވެ. މި ދެ މީހުން ސީރިއާއަށް ވަދެ، އެތަނުގައި މަރުވެފައިވާކަން ކޯޓު ލިޔެކިޔުންތަކުން އެނގެ އެވެ. ނަމަވެސް އަނަސްގެ ފޭސްބުކް އެކައުންޓުން 2019 ވަނަ އަހަރުގެ ނޮވެމްބަރު މަހާ ހަމައަށް ހަރަކާތްތެރިވެފައިވާކަން ފާހަގަކުރެވެ އެވެ.
މި ފަސް މީހުން ސީރިއާއަށް ދިޔައީ 2016 ވަނަ އަހަރުގެ ފެބްރުއަރީ 15 ވަނަ ދުވަހު އެވެ. އެމީހުން ދަތުރުކުރީ ސްރީލަންކާ އަދި ދުބާއީ މެދުވެރިކޮށް ތުކީއަށެވެ. ތުކީއަށް ދިޔުމަށްފަހު މުއާޒާއި އަނަސް ސީރިއާއަށް ވަދެފައިވާއިރު، އެހެން ތިން މީހުން ތުކީ-ސީރިއާ ބޯޑަރުން ހައްޔަރުކޮށް، 2016 ވަނަ އަހަރުގެ މާޗް 19 ވަނަ ދުވަހު ދިވެހިރާއްޖެއަށް ފޮނުވާލި އެވެ.
ހައްޔަރުކުރެވުނު މީހުންނަކީ ލ. މާމެންދޫ މުރިނގު އަހުމަދު ލަތީފް (ޓިކިޓް)، ގދ. ރަތަފަންދޫ ނީލްވިލާ އަހުމަދު ސުހައިލް މޫސާ (ޕާޓީ) އަދި ތ. ގާދިއްފުށި ސީނަރީގޭ މުނައްވަރު އަބްދުﷲ (ޓޯނީ) އެވެ.
