
ދިރާގުން ބުނީ އެ ކުންފުނީގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ޕްރޮގްރާމްގެ ދަށުން ކުޅުއްދުފުށި ސިޓީގައި ހުންނަ ސެން ޔުނިޓްކަމަށްވާ ސަންޝައިން ކްލާހަށް އެކުނުފުނިން އެހީތެރިކަން ފޯރުކޮށްދީފައި ވާކަމަށެވެ.
އެގޮތުން ދިރާގުން ހަދިޔާކޮށްފައިވާ ތަކެތީގެ ތެރޭގައި އޮޓޮމެޓިކް ގޮނޑިއާއި ލޮކިންގް ގޮނޑީގެ އިތުރުން ކުލާހުގެ ސެންސަރީ އަދި އެކްޓިވިޓީ ޔުނިޓަށް ބޭނުންވާ ވަސީލަތްތައް ހިމެނެއެވެ.
މި އެހީތެރިކަމުގެ ސަބަބުން ތަފާތު ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ހދ. އަތޮޅު ތައުލީމީ މަރުކަޒުގެ ސެން ޔުނިޓްގެ ކްލާސްރޫމް ސެޓަޕް އިތުރަށް ފުރިހަމަވާނެ ކަމަށް ވެސް ދިރާގުން ވަނީ ބުނެފަ އެވެ.
މި ތަކެތި ހަވާލުކޮށް، ދިރާގުގެ ކުޅުދުއްފުށި އޮޕަރޭޝަންސް ސެންޓަރުގެ އެސިސްޓަންޓް މެނޭޖަރު އޮޕަރޭޝަންސް، މުހައްމަދު އަލީ ވިދާޅުވީ ދިރާގުން މަސައްކަތް ކުރަމުން އަންނަނީ އެއްވެސް ކުއްޖަކު ބާކީ ނުވާނެހެން މުޖުތަމައުގައި ޝާމިލުކުރުމަށް އެއްބާރުލުންދޭން ކަމަށެވެ. އަދި އުއްމީދަކީ މި ވަސީލަތްތަކުގެ ސަބަބުން ސްކޫލުގެ ޓީޗަރުން ކުރަމުން އަންނަ ބުރަ މަސައްކަތަށް އިތުރު އެހީތެރިކަމެއް ލިބި، ހުރިހާ ކުދިންނަށް ވެސް ކުރިއެރުމާއި އުނގެނުމުގެ ފުރުސަތުތައް ތަނަވަސްވުން ކަމަށް ވެސް ވިދާޅުވި އެވެ.
އެ ރަސްމިއްޔާތުގައި ހދ. އަތޮޅު ތައުލީމީ މަރުކަޒުގެ ޕްރިންސިޕަލް، މުހައްމަދު މަތީން ވަނީ ސަންޝައިން ކުލާހަށް ދިރާގުން ހަދިޔާކުރި ވަސީލްތްތަކުގެ ސަބަބުން އިންކްލޫސިވް އެޑިއުކޭޝަން ފޯރުކޮށްދިނުމަށް ސްކޫލުން ކުރަމުން އަންނަ މަސައްކަތަށް ބޮޑު ކުރިއެރުމެއް ލިބޭނެ ކަމަށް ވިދާޅުވެފަ އެވެ.
ދިރާގުން އަބަދުވެސް މަސައްކަތް ކުރަމުންދަނީ މުވާސަލާތީ ގުޅުމުގެ އިތުރުން މުޖުތަމަޢުއަށް ބޭނުންވާ ކަންކަމުގައި އެހީތެރިކަން ފޯރުކޮށްދިނުމަށެވެ. މިގޮތުން ދިރާގުން މިހާރުވެސް ދަނީ ކުޑަކުދިންނަށް އެހީތެރިވުމާއި މުޖުތަމަޢުގެ ޒުވާނުން ބާރުވެރިކުރުވުމުގެ ގިނަ މަސައްކަތްތަކެއް ކުރަމުންނެވެ.