އޭނާ އިސްތިއުފާ ދެއްވި ސަބަބެއް އަދި ހާމަކޮށްފައެއް ނުވެ އެވެ.
ސައީދު އިސްތިއުފާ ދެއްވީ ޕީއެސްއެމްގެ ކޮންޓެންޓާ ގުޅޭ ދެ މައްސަލައެއް ފެންމަތިވުމަށް ފަހު އެވެ. އޭގެ ތެރޭގައި ހިމެނެނީ ގުރުއާނުގެ އާޔަތްތަކަށް ބަދަލު ގެނައި މައްސަލައާއި އިނގިރޭސި ނިއުސް ސެގްމަންޓެއްގައި ބޭއަދަބީ މަންޒަރެއް ދެއްކި މައްސަލަ އެވެ.
ސައީދު ޕީއެސްއެމްގެ އެމްޑީގެ މަގާމަށް އައްޔަންކުރީ މިދިޔަ އޮގަސްޓު މަހު އެވެ. އެއީ ކުރިން އެ މަގާމުގައި ހުރި ޒީނާ ޒާހިރު އިސްތިއުފާ ދެއްވުމާ ގުޅިގެންނެވެ. ޒީނާ އިސްތިއުފާ ދެއްވީ މިދިޔަ އޮގަސްޓު 24 ގައެވެ.
ގުރުއާނުގެ އާޔަތްތަކަށް ބަދަލު ގެނައި މައްސަލައިގައި ސައީދު ވަނީ އެއީ ޓެކްނިކަލް މައްސަލައެއްގެ ސަބަބުން ކަމަށް ވިދާޅުވެފައެވެ. އަދި އެކަމުގައި އިހުމާލުވި މުވައްޒަފުން ވަޒީފާގެ މަސްއޫލިއްޔަތުތަކުން އެކަހެރިކޮށްފައިވާ ކަމަށް ވެސް ވިދާޅުވެފައިވެއެވެ.
