Muvazzafunnah Dhivehi bahuge thamreen program eh fashaifi

ހަބަރު / އިޖުތިމާއީ

ސަރުކާރު މުވައްޒަފުނަށް ދިވެހި ބަހުގެ ތަމްރީނު ދިނުން

ސަރުކާރުގެ މުވައްޒަފުންނަށް ދިވެހިބަހުގެ ތަމްރީން ޕްރޮގްރާމެއް ފަށައިފި

ގުފްތަގް އަޖީރު

17 ޑިސެމްބަރ 2024 - 21:42:20

ދިވެހިބަހުގެ އެކެޑަމީން ސަރުކާރުގެ ދެ މުއައްސަސާއެއްގެ މުވައްޒަފުންނަށް އަމާޒުކޮށްގެން ދިވެހިބަހުގެ ތަމްރީން ޕްރޮގްރާމެއް މިދިޔަ އާދިއްތަ ދުވަހު ފަށައިފި އެވެ.

މި ޕްރޮގްރާމަކީ ރީޖަނަލް އެއަރޕޯޓްސް ކޮމްޕެނީ (އާރްއޭސީ) އާއި ހައިކޯޓުގެ މުވައްޒަފުންނަށް އަމާޒުކޮށްގެން ކުރިއަށް ގެންދާ ޕްރޮގްރާމެކެވެ. މި ޕްރޮގްރާމް ނިމޭނީ އަންނަ ބުރާސްފަތި ދުވަހު އެވެ.

ދިވެހިބަހުގެ އެކެޑަމީން ބުނީ، މި ޕްރޮގްރާމްގެ މައިގަނޑު މަގުސަދަކީ ދިވެހިބަހުގެ ހަމަތަކާއި ގަވާއިދުތަކާ އެއްގޮތަށް ލިޔެކިޔުންތައް ތައްޔާރުކުރުމާއި، އަދަބު އިހުތިރާމާ އެކު މުއާމަލާތްކުރާނެ ގޮތްތައް މުވައްޒަފުންނަށް އުނގަންނައިދިނުން ކަމަށެވެ.

10 ގަޑިއިރުގެ މި ޕްރޮގްރާމްގައި ލަފުޒު ވަކިކޮށް ލިޔުމުގެ ގަވާއިދާއި ސުކުނާއި ފިލިތައް އޮޅުންފިލުވައިދިނުމާއި ދިވެހިބަހުގެ ދަރަޖަތައް ރީތި ބަހުން އިބާރާތްކުރާނެ ގޮތް ކިޔައިދޭނެ އެވެ. އަދި މި ޕްރޮގްރާމްގައި ކިޔަވައިދެނީ މި ދާއިރާއިން ތައުލީމާއި ތަޖުރިބާ ލިބިފައިވާ ދާރިސުން ކަމަށް އެކެޑަމީން ބުނެއެވެ.