ތަފާތު ގިނަ ހަރަކާތްތަކާއެކު އެމްއައިބީގެ ބިންގާ ފެސްޓިވަލް ބާއްވަން ހަަމަޖެހިފައިވަނީ އަންނަ ހުކުރު ދުވަހުގެ ހަވީރު 4 އަކުން ރޭގަނޑު 10 އަކަށް ކަލާފާނު ސްކޫލްގައެވެ.
ފެސްޓިވަލްގައި ރޭވިފައި ވާ ހަރަކާތްތަކުގެ ތެރެއިން ވެލާ އެޑޮޕްޓް ކުރުމުގެ ފުރުސަތު ހުޅުވާލާފައި މި ވަނީ ނައިފަރުގައި ހުންނަ އަޓޯލް މެރިން ކޮންސާވޭޝަން އާ ގުޅިގެން ކަަމަށް އެމްއައިބީން މައުލޫމާތުދެއެވެ.އެއީ ނައިފަރު ޖުވެނައިލް އިން އެ ރަށުގައި ވެލާ ކަނހަބު ހިމާޔަތްކުރާ ޖަމިއްޔާއެކެވެ. އަދި އެ ހަރަކާތުގެ ތެރެއިން ކުދީންނަށް ވެލާ އާ ބެހޭ މައުލޫމާތު ލިބިގެން ދާނެކަމަށްވެސް އެމްއައިބީން ބުނެއެވެ.
މި ފެސްޓިވަލްއަށް ޒިޔާރާތްކުރާ ކުދިންްނަށް ރާއްޖޭ މަޝްހޫރު ކުޑަކުދިންގެ ލިޔުންތެރިއެއް ކަަމަށްވާ އައިޝާ ހުސެއިން ރަޝީދު " އާންޓީ އައިޝާ" އާއެކު ކިއު އެންޑް އޭ ސެޝަންގައި ވެސް ބައިވެރިވެވޭނެއެވެ.
އެކި ދާއިރާތަކުގެ މައުލޫމާތުތައް ލިބިގެންދާއިރު ފެސްޓިވަލްގައި ފައިނޭންޝަލް ލިޓްރަސީ ކްލާހެއްވެސް ކުރިއއަށް ގެންދިއުމަށް ވަނީ ހަަމަޖެހިފައެވެ. އަދި ކުޑަކުދިން ޝައުގުވެރިވާނެ ފަދަ މި ހަރަކާތްތަކުގެ އިތުރުން ކާބޯތަކެތީގެ ސްޓޯލްތައްވެސް ފެސްޓިވަލްގައި އިންތިޒާމް ކުރެވިފައި ހުންނާނެކަމަށް އެމްއައިބީން ބުނެއެވެ.
