މި މައްސަލަ ކުރިން ބެލި މެޖިސްޓްރޭޓް ކޯޓުން ބޭރުކޮށްލާފައިވަނީ ގޯސްކޮށް ކަމަށް ހައިކޯޓުން ވަނީ ކަނޑައަޅައިފަ އެވެ.
ގދ. އަތޮޅުގެ ރަށެއްގައި ހިނގި މި މައްސަލައިގައި، 13 އަދި 14 އަހަރުގެ ދެ ކުދިންނާ މީހަކު ބެހުނުއިރު، އެކަމަށް އެހީތެރިވެދީ އަދި އަޅާނުލައި ހުރި މީހެއްގެ މައްޗަށް ދައުލަތުން ވަނީ ތިން ދައުވާއެއް ކޮށްފަ އެވެ. އެއީ ދަރިން ބެލެހެއްޓުމުގެ ވާޖިބާއި ދަރިންނަށް އަޅާނުލައި ދޫކޮށްލުމުގެ ދައުވާ އާއި ކުޑަކުއްޖަކު ލައްވާ ޖިންސީ އަމަލެއް ހިންގުމަށް އެހީތެރިވެދިނުމުގެ ދައުވާ އާއި ކުޑަކުއްޖަކާމެދު ޖިންސީ އަމަލެއް ހިންގާކަން އެނގިހުރެ އެކަން ރިޕޯޓް ނުކުރުމުގެ ދައުވާ އެވެ.
މެޖިސްޓްރޭޓް ކޯޓުން މި މައްސަލަ ބޭރުކޮށްލީ ދައުވާ ލިބޭ ފަރާތަށް ވަކީލަކު ހަމަޖެއްސުމަށް އެޓާނީ ޖެނެރަލްގެ އޮފީހަށް ދިން މުއްދަތުގައި ވަކީލަކު ހަމަނުޖެހުމުން، މިފަދަ މައްސަލަތައް ވަކީލަކާ ނުލައި ކުރިއަށް ނުގެންދެވޭނެ ކަމަށް ބުނެ އެވެ.
ނަމަވެސް ހައިކޯޓުން ބުނީ މައްސަލަ ބޭރުކޮށްލި ސަބަބަކީ ގާނޫނާއި ގަވާއިދުގައި ތަސައްވުރުކުރާ ހާލަތެއް ނޫން ކަމަށެވެ. އެހެންކަމުން މެޖިސްޓްރޭޓް ކޯޓުގެ ނިންމުން ބާތިލުކޮށް، މައްސަލަ އަލުން ބެލުމަށް ހައިކޯޓުން ވަނީ އަމުރުކޮށްފަ އެވެ.
- މައްސަލަ ހިނގާފައިވަނީ 2005 ވަނަ އަހަރުން ފެށިގެން
- ދައުވާ ލިބުނު ފަރާތުގެ އަމިއްލަ ދެ ދަރިންނާ މީހަކު ބެހުނުއިރު އަޅާނުލައި ހުރި
- ކުދިންގެ އުމުރަކީ 13 އަދި 14 އަހަރު
- މެޖިސްޓްރޭޓް ކޯޓުން މައްސަލަ ބޭރުކޮށްލީ ވަކީލަކު ހަމަނުޖެހުމުން
- ހައިކޯޓުން ވަނީ މައްސަލަ އަލުން ބެލުމަށް އަމުރުކޮށްފައި
