މީގެ ކުރިން، ފެމިލީ ކޯޓުން އަޟްހާ އީދާ ގުޅިގެން ބައެއް ދުވަސްތަކުގައި ކައިވެނިކޮށް ނުދީ ހުރިނަމަވެސް އަންނަ އަހަރުވެސް އަހަރުގެ ހުރިހާ ދުވަހަކު ކައިވެނިކޮށްދޭނެކަން މިހާރުވަނީ އިއުލާންކޮށްފައެވެ.
ފެމެލީ ކޯޓުން އިއުލާންކޮށްފައިވާ ގޮތުން، ރަސްމީ ދުވަސްތަކާއި ހުކުރު، ހޮނިހިރު ނޫން ބަންދު ދުވަސްތަކުގައި ހެނދުނުން ފެށިގެން ރޭގަނޑަށް ކައިވެނިކޮށްދޭނެއެވެ. އަދި ބަންދު ދުވަސްތަކުގައި މެންދުރު ފަހުން ފެށިގެން ރޭގަނޑަށް ކައިވެނިކޮށްދޭނެއެވެ. ކޯޓުން ބޭރުގައި ކުރާ ކައިވެނިތައް ކޮންމެ ދުވަހަކުވެސް މެންދުރު ފަހުން ފެށިގެން ކޮށްދޭނެއެވެ.
އަންނަ އަހަރުގެ ހުރިހާ ދުވަހަކުވެސް ކައިވެނިކޮށްދޭން ނިންމާފައިވާއިރު، މިދިޔަ އަހަރު މާލެ ސަރަހައްދުގައި 2،425 ކައިވެނިކޮށްފައިވެއެވެ. މިދިޔަ އަހަރު މާލެ ސަރަހައްދުގައި ކުރި ވަރީގެ އަދަދަކީ 1،281 ކަމަށް ހިސާބުތައްކުން ދައްކައެވެ.
ފެމިލީ ކޯޓުގެ ތަފާސްހިސާބުތަކަށް ބަލާއިރު މިދިޔަ އަހަރު އެންމެ ގިނަ ކައިވެނިކުރީ ޑިސެމްބަރު މަހު އެވެ. އެއީ 306 ކައިވެންޏެވެ. މިދިޔަ އަހަރު އެންމެ ގިނައިން ވަރި ކޮށްފައިވަނީ އޮކްޓޫބަރު މަހު އެވެ. އެއީ 139 ވަރި އެވެ. މިދިޔަ އަހަރު ރާއްޖެއިން ބޭރުގައި 163 ކައިވެނި ކޮށްދީފައިވެ އެވެ.
