އެ ކޯޓުން ބުނީ އަންނަ އަހަރު ހުރިހާ ދުވަހެއްގައި ކައިވެނިކޮށްދޭނީ ހަފުތާ ބަންދު ވެސް ހިމެނޭހެންކަމަށެވެ. ފެމެލީ ކޯޓުން ވަނީ އަންނަ އަަހަރު އެ ކޯޓުން ކައިވެނީ ކޮށްދޭން ނިންމާފައިވާ ވަގުތުތައް އާއްމުކޮށް އިއުލާންކޮށްފައެވެ.
ފެމިލީ ކޯޓުން ބުނީ އަންނަ އަހަރު ރަސްމީ ދުވަސްތަކާއި ހަފްތާ ބަންދު ނޫސް ދުވަސްތަކުގައި ކައިވެނި ކޮށްދޭނީ ތިން ވަގުތެއްގައި ކަމަށެވެ. އެއީ ހެނދުނު 09:00 އިން 11:30 އަށް، މެންދުރު 13:00 އިން 13:30 އަށް އަދި ހަވީރު 15:00 އިން 21:30 އަށްކަމަށް އެކޯޓުން ބުނެއެވެ.
ހަފްތާ ބަންދު ދެ ދުވަހު ކައިވެނި ކޮށްދޭ ވަގުތުތައް
- 15:00 އިން 21:30 އަށް (ހުކުރު)
- 10:00 އިން 21:30 އަށް (ހޮނިހިރު
ރިސޯޓު ނުވަތަ ސަފާރީ ފަދަ ތަންތަނުގައި ކައިވެނިކޮށްދޭ ގަޑި ހަމަޖައްސާނީ އެކަމަށް އެދި ހުށަހެޅުމުން، ހުށަހަޅާ ފަރާތްތަކާއި ކޯޓުގެ ވަގުތުތަކަށް ރިޢާޔަތްކޮށްފައިކަމަށް ފެމިލީ ކޯޓުން ބުނެއެވެ. އަދި 1446 ވަނަ އަހަރުގެ ރަމަޟާން މަހާއި ޝައްވާލު މަހުގެ ފުރަތަމަ 07 ދުވަހު ކައިވެނި ކޮށްދޭނެ ގަޑިތައް ކޯޓުން ފަހުން އިޢުލާން ކުރާނެކަމަށްވެސް އެކޯޓުން ބުނެއެވެ.
ވޭތުވެދިޔަ އަހަރުތަކުގައި، ހަފުތާ ބަންދު ދުވަސްތަކުގައި ކޯޓުގައި ކައިވެނިކޮށްދެމުން ނުދިޔަ ނަމަވެސް، އެކަމަށް އެދޭފަރާތްތައް އިތުރުވަމުންދާތީ، މިފެށޭ އަހަރު އެދުވަސްތަކުގައިވެސް ކޯޓުގައި ކައިވެނި ކޮށްދިނުމުގެ އިންތިޒާމު ހަމަޖެހިފައިވާކަމަށްވެސް ފެމިލީ ކޯޓުން ބުނެއެވެ.
