އިނގިރޭސިވިލާތަށް އުފަން ހަމްޒާގެ މަންމައަކީ ބަންގްލަދޭޝްގެ ސިލެޓް ޑިވިޝަނަށް ނިސްބަތްވާ މީހެކެވެ. ރަށްވެހިކަން ބަދަލުކޮށް ހަމްޒާއަށް މިހާރު ބަންގްލަދޭޝްގެ ޕާސްޕޯޓު ލިބި، އަދި ފީފާގެ ކްލިއަރެންސްވެސް ލިބިއްޖެއެވެ. މާނައަކީ މިހާރު އޭނާއަށް ބަންގްލަދޭޝްގެ ގައުމީ ޓީމަށް ކުޅެވޭނެއެވެ.
ރިޕޯޓްތައް ބުނާ ގޮތުން ހަމްޒާ އެންމެ ފުރަތަމަ ގައުމީ ޓީމަށް ކުޅޭ މެޗަކީ އަންނަ އަހަރުގެ މާރިޗު މަހު އޮންނަ އޭޝިއަން ކަޕް ކޮލިފައިން މެޗުތަކެވެ. ދެން އޮންނަ ސާފް ޗެމްޕިއަންޝިޕްގައިވެސް ހަމްޒާ ޗައުދަރީ ކުޅުމަކީ އެކަށީގެންވާ ކަމެކެވެ.
ހަމްޒާ ޗައުދަރީވަނީ އިގިރޭސި 21 އަހަރުން ދަށުގެ ގައުމީ ޓީމަށް ކުޅެފައެވެ. އަދި އޭގެ އިތުރުން އިގިރޭސި އެފްއޭކަޕް ކާމިޔާބު ކުރި ލެސްޓަ ސިޓީގެ ޓީމުގައާއި އެފްއޭ ކޮމިއުނިޓީ ޝީލްޑް އަދި މިދިޔަ ސީޒަންގެ އިގިރޭސި ދެވަނަ ޑިވިޝަން ކާމިޔާބު ކުރި ލެސްޓަ ސިޓީގެ ޓީމުގައި އޭނާ ހިމެނިފައިވެއެވެ.
ހަމްޒާ ޗައުދަރީ ބަންގްލަދޭޝްގެ ގައުމީ ޓީމަށް ކުޅެފިނަމަ އޭނާ ވެގެންދާނީ ދެކުނު އޭޝިއާ ސަރަހައްދުގެ އެންމެ ހައި ޕްރޮފައިލް ކުޅުންތެރިޔާއަށެވެ. އޭނާވަނީ ޖެމީ ވާޑީ އަދި ފިލް ފޯޑެން ފަދަ މަޝްހޫރު އެތައް ކުޅުންތެރިންނަކާ އެކު ކުޅެފައެވެ.
