ފަހުމީ މިހެން ވިދާޅުވީ ސްޓެލްކޯއަށް 75 އަހަރު ފުރުމާއި ގުޅިގެން ސޯޝިއަލް މީޑިއާގައި ހިއްސާކުރެއްވި ޕޯސްޓެއްގަ އެވެ.
ފަހުމީ ވިދާޅުވީ، ލިބޭ އެންމެ ބޮޑު ހިތްހަމަޖެހުމަކީ ގައުމު ބިނާކުރުމާއި، ތަރައްގީއާއި ތަހުޒީބަށް މަގުފަހިކޮށްދީ އިންސާނީ އަދި އުމްރާނީ ތަރައްގީއަށް ކަރަންޓުގެ ހިދުމަތްތެރީން އިހްލާސްތެރިކަމާއެކު ކޮށްދީފައިވާ އަދި ކޮށްދެމުންގެންދާ އަގުހުރި މަަސައްކަތްތަކެއް ކަމަށެވެ.
އަދި މި ކާމިޔާބީގެ ވާހަކަތައް ތާރީހުގައި ލިޔެވިގެންދާއިރު، މި ސިނާއަތުގައި މަސައްކަތްކުރައްވާ މުވައްޒަފުންނާމެދު އޭނާ ފަހުރުވެރިވާ ކަމަށްވެސް ފަހުމީ ވިދާޅުވެފައި ވެއެވެ.
ފަހުމީ ވަނީ އެކިއެކި ގޮންޖެހުންތަކާ ކުރިމަތިލައްވައިގެން، ކާމިޔާބީގެ ހަރުފަތްތައް ގިރާކުރައްވަމުން އަލިމަސް ޔޫބީލްއާ ހަމައަށް ވާސިލުވުމުގައި، މި ސިނާއަތުގައި އެކި ދުވަސްވަރު މަސައްކަތްކޮށްދެއްވާފައިވާ ބޭފުޅުން ގައުމާއި ރައްޔިތުންގެ ކުރިއެރުމަށް ކޮށްދެއްވި ހިދުމަތްތަކަށާއި، އަދި މިހާރު ތިއްބެވި ބޭފުޅުން މެދުކެނޑުމެއް، ފޫހިކަމެއް އަދި ވަރުބަލިކަމެއްނެތި ކޮށްދެއްވަމުންގެންދަވާ އަގުހުރި ހިދުމަތްތަކަށް ޝުކުރު ދަންނަވާފައެވެ.
އެންމެ 14 ކިލޯވޮޓްގެ ކެޕޭސިޓީއަކާއެކު 1949 ވަނަ އަހަރު އުފެދުނު ސްޓެލްކޯއިން ފުރަތަމަ ހިދުމަތް ދިނީ މާލޭގެ އެންމެ 50 ގެއަކަށެވެ. ދިހަވަރަކަށް އަހަރު ތެރޭގައި 1997 ވަނަ އަހަރު ސްޓޭޓް އިލެކްޓްރިކް ކޮމްޕެނީ ލިމިޓެޑަށް ވުމުގެ ކުރިން ސަރުކާރުގެ ޑިޕާޓްމަންޓެއްގެ ގޮތުގައި މަސައްކަތް ކުރިއިރު، މިހާރު ސްޓެލްކޯއިން 80،973 އަށް ވުރެ ގިނަ ކަސްޓަމަރުންނަށް ކަރަންޓް ފޯރުކޮށްދެ އެވެ.
ސަރުކާރުގެ އަމާޒަކީ ރާއްޖޭގައި އުފައްދާ ހަކަތައަކީ ތިމާވެއްޓާ ރައްޓެހި އެއްޗަކަށް ހަދާ ހަކަތަ އުފެއްދުމަށް ތެލަށް ކުރަމުން އަންނަ ހޭދަ ކުޑަކުރުމެވެ. މީގެއިތުރުންވެސް އިޔާދަކުރަނިވި ހަކަތައަށް ބަދަލުކުރުމުގެ ބޮޑެތި މަޝްރޫޢުތަކެއް ރާއްޖޭގެ އެކި ރަށްރަށުގައި އަންނަނީ ހިންގަމުންނެވެ.
