ވައްޑެ މިހެން ވިދާޅުވީ ސީއެންއެމް އިން ގެނެސްދޭ "ނޭޝަން ޓޯކް" ޕޮޓްކާސްޓު ގައި ވާހަކަ ދައްކަވަމުންނެވެ.
"ސީއެންއެމް" އިން އަންނަނީ ދައުލަތް ނުވަތަ ސަރުކާރު ހިންގުމަށް މިހާރުއޮތް އޮނިގަނޑު ބަދަލުކޮށް، ބޮޑުންގެ ގޭދޮށުގައި މުގޯލި އަޅަން ނުޖެހި ދިރިއުޅެވޭނެކަން ކަށަވަރުވާ ފަދަ ހިންގުމުގެ އާ އޮނިގަނޑެއް ހޯދުމަށް ރައްޔިތުން ހޭލުންތެރި ކުރުމަށް މަސައްކަތްތަކެއް ކުރަމުން ނެވެ.
"ނޭޝަން ޓޯކް"ގެ 9 ވަނަ ޕްރޮގްރާމްގައި ވާހަކަ ދައްކަވަމުން ދަ ޑިމޮކްރެޓްސް ލާމަރުކަޒީ ކޮމިޓީގެ މުގައްރިރު ކަންވެސް ކުރައްވާ ވައްޑެ ވިދާޅުވީ ރައްޔިތުންގެ ތާއީދު ނެތިއްޔާ އިތުރު އުޒުރެއް އިތުރު ސަބަބެއް އޮންނާކަށްވެސް ނުޖެހޭ ކަމަށާއި ސިޔާސީ މީހުންނަކީ ނުވަތަ ޕަބްލިކް އޮފިޝަލުންނަކީ ރައްޔިތުންގެ ތާއީދު މަތީގައި ހުންނަށް ޖެހޭ ބައެއް ކަމަށެވެ. އަދި ވިދާޅުވީ ތާއީދު ނެތިއްޔާ ސިޔާސީ މީހެއްގެ މައްޗަށް އިތުރު ތަހުގީގެއް ހިންގުމަކާއި ނުލާ ކޮންމެހެން ވައްކަމެއް ސާބިތުވާ ދެން ތިބެން ނުޖެހޭ ކަމަށެވެ.
ސަބަބަކީ މިހާރު ސިޔާސީ ވެރިން ކުރާ ވައްކަމެއް ސާބިތު ކުރުން ވެސް އެއީ ދަތި ކަމެއްކަމަށާއި ސަބަބަބީ މިހާރު އެންމެ ވަރުގަދަޔަށް އުފެއްދި ނޮލެޖަކީ ގަޔަށް ރުލެއް އަރުވާނުލާ ވައްކަން ކުރުން ކަމަށާއި ސިސްޓަމަށް ނުހިފޭ ބާގަނޑުތަކުގެ ތެރެއިން މިހާރު ވައްކަން ކޮށްލުމަކީ ސިޔާސީ ވެރިން ނިކަން ފަރިތަކޮށް ކުރާ ކަމެއް ކަމަށެވެ.
މާއްދާ 4 ގައި ބުނާ ގާނޫނީ ތަސައްވަރު މިހާރު ހިނގާތޯ ސުވާލު ކުރުމުން ވައްޑެ ވިދާޅުވީ ފުރަތަމަ ކަމަކަށް ފެށިގެން އަންނަނީ ވެސް ރަނގަޅަށް ކަމަކަށް ގަބޫލު ނުކުރައްވާ ކަމަށެވެ. ގާނޫނު އަސާސީގެ 4 ވަނަ މާއްދާގަ ބުނަނީ "ދިވެހި ދައުލަތުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މި ބާރުތައް ދެމި އޮންނަނީ ރައްޔިތުންގެ ކިބައިގައެވެ"
މިސާލެެއްގެ ގޮތުން އޭނާ ފާހަގަކުރެއްވީ ޑިމޮކްރަސީ އަށް ފުރޮޅުނު ފަހުން 2007 ވަނަ އަހަރު ތަސްދީގު ކުރެވުނު ފެހި ގާނޫނު އަސާސީގެ ފަހުން ބޭއްވުނު 4 އިންތިހާބުގައިވެސް އިންތިހާބު ކާމިޔާބު މިކުރާ މީހަކީ ރައްޔިތުންނަށް މާ މަގުބޫލް ވެގެން ސިޔާސަތު މާ ރަނގަޅުވެގެން ހޮވޭ މީހުންނެއް ނޫން ކަމުގައި އެވެ. އޭގެ ބަދަލުގައި އަބަދުވެސް ފެންނަ މަންޒަރަކީ އެންމެ ފަހުން ރައްޔިތުން ހޮވި މީހާ ބަދަލުކުރަން އެހެން ގޮތެއް ހޯދަން ރައްޔިތުން ވޯޓްލާ މަންޒަރު ފެންނަ ކަމަށެވެ.
މީގެ އިތުރުން ދިވެހި ރައްޔިތުންނަށް ކަމެއް ގައި ގޮތެއް ކަޑައެޅުމަށް ހަމަ އެކަނި ރައީސް އަކަށް އަންނަ މީހަކު ބަދަލުކުރަންވެސް މި ލިބެނީ ކޮންމެ 5 އަހަރަކުން 1 އަހަރު ކަން ފާހަގަކުރައްވާ ވައްޑެ ވިދާޅުވީ ރެފެރެންޑަމް އަކަށް ދިޔުމުގެ ޖާގަ ގާނޫނު އަސާސީގައި ދިވެހި ރައްޔިތުންނަށް އޮތް ނަމަވެސް އެފުރުސަތެއް ނުލިބޭ ކަމަށެވެ. އަދި 5 އަހަރުން މި އަންނަ ރިޔާސީ އިންތިހާބު ސިފަ ވަނީ ޔޫރޯ ފައިނަލްގައި ކޮންމެސް 2 ޓީމެއް ކުޅޭތީވެ ރައްޔިތުން އޭގެ ތެރެއިން އެއްޓީމަކަށް ތާއީދު ކުރަން ލިބޭ ފުރުސަތެއް ގޮތުގައި އެވެ.
ވައްޑެ ވިދާޅުވީ 5 އަހަރުން އެއް ފަހަރު ވެރިކަން ކާމިޔާބު ކުރާ ބަޔަކު ވެރިކަން ހޯދުމަށް ގައުމު ހަމައަށް އަޅުވާ ގައުމު ކުރިއަށް ގެންދިޔުމަށޭ ނޫނީ ކުރީ ސަރުކާރުގެ ކޮރަޕްޝަން ބެލުމަށޭ މިކަހަލަ ވައުދުތަކާއެކު ބައިވަރު މީހުންނާ ގުޅި ބޮޑު ކޯލިޝަނެއް ވެސް ހަދައިގެން އިންތިހާބު ކާމިޔާބު ކުރާ ކަމަށާއި ނަމަވެސް ވެރިކަމަށް ވަޑައިގަންނަވާ ހިސާބުން ކޮންމެ މީހަކުވެސް މި ގެންގުޅުއް ވަނީ "ވިރާސީ" ރަސްކަމެއްގައި ރަސްކަލަކަށް އޮންނަ ބާރު ކަމަށެވެ.
ވައްޑެ ވިދާޅުވީ ރައްޔިތުންގެ ކިބައިގައި މިއަދު އޮތީ ދޮގެއްގެ މަތީގައި ތިބުން ކަމަށެވެ. ސަބަބަކީ މިތިބީ ޑިމޮކުރަސީ އެއްގައޭ، ގުޑް ގަވާނަރސް ނުވަތަ ހެޔޮވެރިކަމެއްގެ ނިޒާމުގައޭ ބުނެވޭ ބުނުން ނުވަތަ މިތިބީ އިންސާފު ގާއިމުކޮށްގެންނޭ މިނިވަން މުވައްސަސާތަށް ހަދައިގެންނޭ ރައްޔިތުން ގެ ފަރާތުން ވަކާލާތު ކުރާ މަޖިލީހެއް ހޮވައިގެންނޭ ބުނާ ބުނުން މީ ވަރަށް ބޮޑެތި ދޮގު ވާހަކަތަކެއް ކަމަށެވެ. އެ ތަންތަނުގެ ނަމާއި މަފުހޫމް އެއް ދިމާލަކަށް ގެންދެވޭނެ މަގަށް މިހާރުގެ ހިންގުމުގެ އޮނިގަނޑަށް ވަރަށް ބޮޑެތި ބަދަލުތަކެއް ގެންނަށް ޖެހޭ ކަމަށް ރާއްޖޭގެ ހުރިހާ އެންމެން އެއްބަސް ވާކަން ވައްޑެ ފާހަގަކުރެއްވި އެވެ.
މިހާރަށް ވުރެ ބޮޑު ބާރެއް ރައްޔިތުންނަށް ދޭން ޖެހޭ ކަން ފާހަގަކުރައްވާ ވައްޑެ ވިދާޅުވީ ރައީސުލްޖުމުހޫރިއްޔާ ނޫނީ ބޮޑު މީހެއް މިހާރު ނުފެންނަ ކަމަށާއި އެހެން ކަމުން ރައީސުލްޖުމުހޫރިއްޔާ ވެސް "ކުޑަ" ވާން ޖެހޭ ކަމަށެވެ. ރައީސުލްޖުމްހޫރިއްޔާ އަތްޕުޅުން ނޫން ގޮތަކަށް ވަޒީފާއެއްވެސް ނުލިބޭ ކަމުގެ އިހްސާސް މިއަދު ރައްޔިތުންނަށް ކުރެވޭ ކަމަށާއި ވަޒީފާގެ ފެންވަރާއި ޝަރުތު ނުވަތަ ވިޔަފާރި ވެރިޔަކަށް ފޯރުކޮށްދޭ ޕްރޮޖެކްޓެއް ވިޔަސް ލޯނެއް ވިޔަސް ސަރުކާރުން ފޯރުކޮށްދޭ އަސާސީ ހިދުމަތެއް ވިޔަސް މީހަކަށް އެހީ އެއް ދިނަސް އެއްވެސް އެއްޗެއް މިހާރު ސަރުކާރުގައި އެވަގުތެއްގައި ތިބޭ ބަޔެއްގެ ތައްޕާހުން ނޫން ގޮތަކަށް ނުލިބޭ ތަން ރައްޔިތުންނަށް ފެންނަ ކަމަށެވެ.
މިއަދު ވޯޓް ކަރުދާހުން ބަދަލުވެގެން މި އުޅެނީ ޕްރިންޓް ކުރިގޮތް އެކަނި ކަން ފާހަގަކުރައްވާ ވައްޑެ ވިދާޅުވީ "ދިވެހި ދައުލަތުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މި ބާރުތައް ދެމި އޮންނަނީ ރައްޔިތުންގެ ކިބައިގައެވެ" މިހެން ރައްޔިތުމީހާ ބާރަށް އަޑު ހަރުކޮށް ބުނަން މިއަދު ޖެހޭ ކަމަށެވެ.
ވައްޑެ ވިދާޅުވި ގޮތުގައި ރާއްޖޭގެ މުޅި އެތުރުން ގަނޑު ނުވަތަ ހިންގުމުގެ އޮނިގަނޑުގެ ބަހުސެއް ފަންނީ ގޮތެއްގައި އަލުން ފަށަން ވެއްޖެ އެވެ. އެގޮތުން ދެހާހުގެ އަހަރު ތަކުގެ ތެރޭގައި ރާއްޖެއަށް އާ ގާނޫނު އަސާސީ ގެންނަން ހިންގި "މިނިވަން ބަހުސް" ނުވަތަ އިސްލާހީ ރިފޯމްގެ ވާހަކަތަށް އަލުން ވަރަށް ބޮޑަށް ދައްކަން ޖެހިއްޖެ އެވެ.
އަދި ވިދާޅުވީ ވެރިންގެ ބޮޑާކަން، ކިބުރުވެރިކަން، އައުދާނަކަށް މި ސިފަތައް ކަޑުވަން ޖެހޭ ކަމަށާއި ހާއްސަކޮށް އާއްމު ރައްޔިތުންގެ ވޯޓަކުން ހޮވާ މީހުންގެ ނިސްބަތް އިތުރުވާން ޖެހޭ ކަމަށެވެ. އަދި މުޅި ރާއްޖޭގެ މީހުން ވެރިންގެ "މުށަށް" ލުމާއި ބަނޑު އެޅުމުގެ ތަބީއަތް ވެސް ރޫޅާލަން ޖެހޭ ކަމަށެވެ.
