މިއަދު ފަޒުލް އާންމު ކުރެއްވި ސިޓީއެއްގައި ވިދާޅުވީ އޭނާ އެޗްޑީސީގެ އެމްޑީކަމާ ހަވާލުވީއްސުރެ ކުރަމުންދާ ތުހުމަތުތަކާއި އަދި މިހާރުވެސް ކުރަމުން އަންނަ ތުހުމަތުތަކަށް އިންކާރުކުރާ ކަމަށެވެ.
"ބިންވެރިޔާ ސްކީމާ ގުޅިގެން ކުންފުންޏަށް އަމާޒުވެފައިވާ ތުހުމަތު ތަކަކީ ކުންފުންޏާ އެއްވެސް ގުޅުމެއް ނެތް ތުހުމަތުތަކެއް ކަމުގައި ދަންނަވަން،" ފަޒުލް ސިޓީގައި ވިދާޅުވެފައިވެއެވެ.
ފަޒުލް ވިދާޅުވީ އިސްތިއުފާ ދެއްވީ ބިންވެރިޔާ ސްކީމާއި ގުޅިގެން ކުރިއަށްދާ ތަހުގީގަށް ފުރުސަތު ދިނުމަށާއި، ކުންފުންޏާއި ސަރުކާރުގެ ސިޔާސަތުތައް ކުރިއަށް ގެންދިއުމުގެ ގޮތުންކަމަށެވެ.
ފަޒުލް އިސްތިއުފާ ދެއްވާފައިވާއިރު އޭނާގެ ޕާސްޕޯޓުވެސް ވަނީ ހިފަހައްޓައިފައެވެ.
ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލާގެ ޖިނާއީ ތަހުގީގެއް ފެށިފައިވާއިރު، މިހާރު މަގާމުން ސަސްޕެންޑް ކޮށްފައި ހުރި ފަޒުލް ރަޝީދުއާއެކު އޭނާގެ ބޭބެ ފަޒީލް ރަޝީދު ހިމެނޭހެން 20 މީހެއްގެ ޕާސްޕޯޓް ހިފަހައްޓާފައިވާ ކަމަށްވަނީ މައުލޫމާތު ލިބިފަ އެވެ.
ފަޒުލްގެ ބޭބެ، ފަޒީލްއަކީ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރެވެ.
ފަޒުލްގެ ޕާސްޕޯޓް ހިފަހައްޓާފައިވާ ކަމަށް މައުލޫމާތު ލިބިފައިވާއިރު، ފަޒުލް އަށް އެއްވެސް ތުހުމަތެއް ފުލުހުން އަދި ނުކުރާ ކަމަށް ފުލުހުން ރޭ ބުންޏެވެ.
ފުލުހުންގެ ތަހުގީގާ ގުޅިގެން ޕާސްޕޯޓް ހިފެހެއްޓީ މީހުންނާ ބެހޭ ތަފްސީލް އަދި ހާމަކުރެވެން ނެތް ކަމަށް ފުލުހުންވަނީ ބުނެފައެވެ.
ބިންވެރިޔާ ސްކީމުން ނުހައްގުން ގޯތި ދީފައިވާ ކަމުގެ ތުހުމަތުތަކެއް ފެންމަތިވީ، އެކަމާ ގުޅުންހުރި ލިޔެކިޔުންތަކެއް އާންމުވުމާ ގުޅިގެންނެވެ. އެގޮތުން ހުޅުމާލެ ބަލަހައްޓާ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑީއެމްޑީ މުހައްމަދު ފަޒީލް ރަޝީދަށް ގޯއްޗެއް ދިނުމަށް ހަދައިފައިވާ އެއްބަސްވުމެއް ވެސް އާންމުވެފައިވެ އެވެ.
