މީގެ ދިހަ އަހަރު ކުރިން ގެއްލުނު ޕެސެންޖަރު ޖެޓެއް ހޯދުމުގެ މަސައްކަތް އަލުން ފެށުމަށް މެލޭޝިއާ ސަރުކާރުން އެއްބަސްވެފައިވާކަން އިއުލާންކޮށްފައިވާއިރު، މިއީ އޭވިއޭޝަންގެ ތާރީހުގައި ވެގެންދާނެ އުނދަގޫ އެއް މަސައްކަތްކަން ކަމާ ބެހޭ މާހިރުން ފާހަގަކުރެ އެވެ.
މެލޭޝިއާ އެއާލައިންސް (އެމްއެޗް) ގެ ފްލައިޓް އެމްއެޗް370 ގެއްލިގެން ދިޔައީ 2014 ވަނަ އަހަރުގެ މާޗް މަހު މެލޭޝިއާގެ ވެރިރަށް ކުއަލަލަމްޕޫރު އިން، ޗައިނާގެ ބެއިޖިން އަށް ދަތުރު ކުރަމުން ދަނިކޮށެވެ. ޕަސަންޖަރުންނާއި ފަޅުވެރިން ހިމެނޭހެން އެ ބޯޓުގައި ދަތުރު ކުރީ ޖުމްލަ 239 މީހުންނެވެ.
ފާއިތުވެގެން ދިޔަ އަހަރުތަކުގައި ފްލައިޓްގެ ބައިތައް ހޯދުމަށް ކުރި މަސައްކަތްތައް ކާމިޔާބު ނުވެ، އެ ހިތާމަވެރި ހާދިސާގެ ސަބަބުން އެތައް ސަތޭކަ އާއިލާތައް މިއަދުވެސް ހުރީ މާޔޫސްކަން މަތީގައި އެވެ.
މެލޭޝިއާގެ ޓްރާންސްޕޯޓް މިނިސްޓަރު އެންތޮނީ ލޯކޭ ހުކުރު ދުވަހު ހާމަކުރެއްވި ގޮތުގައި އެމެރިކާގެ މެރިން އެކްސްޕްލޯރޭޝަން ކުންފުނި އޯޝަން އިންފިނިޓީއާ އެކު 70 މިލިއަން ޑޮލަރުގެ އެއްބަސްވުމަކަށް ކެބިނެޓުން ވަގުތީ ރުހުން ދީފައިވާ ކަމަށް ވިދާޅުވި އެވެ.
"ނޯ ފައިންޑް، ނޯ ފީ" ގެ އެއްބަސްވުމެއްގެ ދަށުން އޯޝަން އިންފިނިޓީއަށް ފައިސާ ލިބޭނީ ބޯޓުގެ ބައިތައް ހޯދިއްޖެ ނަމަކަން މެލޭޝިއާގެ ސަރުކާރުން ބުނެ އެވެ.
2018 ވަނަ އަހަރު ވެސް އޯޝަން އިންފިނިޓީން ވަނީ ހަމަ އެ ޝަރުތުތަކުގެ ދަށުން އެމްއެޗް370 ހޯދުމަށް މަސައްކަތްކޮށްފަ އެވެ. އަދި 3 މަސް ފަހުން މަސައްކަތް ނިންމާލީ، އެ މަސައްކަތް ނާކާމިޔާބު ވެގެންނެވެ.
މެލޭޝިއާގެ ކަމާބެހޭ ފަރާތްތަކުގެ "ގަބޫލުކުރެވޭ" ކަމަށް ބެލެވޭ އާ ޑޭޓާތަކުގެ އެހީއާއެކު، މިފަހަރު އިންޑިއާ ކަނޑުގެ ދެކުނުގެ 15،000 އަކަކިލޯމީޓަރުގެ ސަރަހައްދެއް ހިމެނޭ ގޮތަށް އަލުން ހޯދުމުގެ މަސައްކަތް ކުރިއަށް ގެންދާނެ ކަަމަށް އެ ގައުމުގެ ސަރުކާރުން ބުނެ އެވެ.
