ފުލުހުންގެ ދައުރަށް ހުރަސް އަޅައި، ހޮސްޕިޓަލު ތެރޭގައި އަޑުގަދަކޮށް ހަޑިހުތުރު އެއްޗެހި ކީ މައްސަލައިގައި ހައްޔަރުކޮށްފައިވަނީ އުމުރުން 48 އަހަރުގެ ދިވެހި ފިރިހެނެކެވެ. އޭނާ ހައްޔަރުކޮށް ކޯޓަށް ހާޒިރުކުރުމުން، ފަސް ދުވަހު ބަންދުކޮށްފައި ބެހެއްޓުމަށްވަނީ އަމުރު ކޮށްފައެވެ. މި މީހާގެ ބަންދު އަމުރު ރިޕޯޓުން އެނގޭ ގޮތުގައި މިއީ ބަންދު ރެކޯޑް އޮންނަ މީހެކެވެ.
މި މީހާގެ މައްޗަށް ފުލުހުން ކުރާ ތުހުމަތަކީ ފުލުހުންގެ ދައުރު އަދާކުރުމަށް ހުރަސް އެޅުމުގެ ތުހުމަތެވެ. ހޮސްޕިޓަލުގައި އަޑުގަދަކޮށް ނުހެދުމަށް މި މީހާއަށް ނަސޭހަތް ދިނުމުންވެސް ފުލުހުންގެ އަމުރަށް ކިޔަމަން ނުވެ، އަޑުގަދަކޮށް ހަޑިހުތުރު އެއްޗެތި ކިޔައި އުޅުނު ކަމަށްވަނީ މައުލޫމާތު ލިބިފައެވެ.
ބަންދު އަމުރު ރިޕޯޓުން އެނގޭ ގޮތުގައި މި މީހާގެ ބަލި ހާލަތަށް ރިއާޔަތްކޮށް އޭނާގެ ފަރުވާގެ ކަންކަން ކުރިއަށް ގެންދިޔުމަށް ކޯޓުންވަނީ އަންގާފައެވެ.
