އެޗްޑީސީއަށް އިއްޔެ އައްޔަންކުރި މެނޭޖިން ޑިރެކްޓަރު ތައާރަފުވުމުގެ ގޮތުން މިއަދު ކޮމިޝަނާ އޮފް ޕޮލިސްއާ ވަނީ ބައްދަލުކުރައްވައިފަ އެވެ.
ފުލުހުން ބުނީ އެ ބައްދަލުވުމުގައި ގެދޮރުވެރިޔާ އަދި ބިންވެރިޔާ ސްކީމާ ގުޅޭގޮތުން ހިނގަމުންދާ ތަހުގީގާ ބެހޭ ގޮތުން ވެސް މަޝްވަރާ ކުރެއްވި ކަމަށެވެ.
ފުލުހުންގެ މައި އިދާރާގައި ބޭއްވި މި ބައްދަލުވުމުގައި އެޗްޑީސީގެ ޗެއާމަން އަހުމަދު ނާސިފް (ޑީޑީ) ވެސް ބައިވެރިވެވަޑައިގަތެވެ. ސީޕީ ޝުޖާއުގެ އަރިިހުގައި ދެ ޑެޕިއުޓީ ކޮމިޝަނަރުން ކަމަށް ފަރުހާދު ފިކުރީ އާއި އިސްމާއިލް ނަވީން އަދި މިހާރު ކުރިއަށް ގެންދާ އެޗްޑީސީގެ އެކިއެކި މައްސަލަތަކުގެ ތަހުގީގުގައި އެންމެ އިސްކޮށް ހަރަކާތްތެރިވެވަޑައިގަންނަވާ އެސިސްޓެންޓް ކޮމިޝަނަރު އަބްދުﷲ ޝަރީފް ބައިވެރިވެވަޑައިގަތެވެ.
ގޯތި ވައްކަމަށް ފަހު އެޗްޑީސީގެ ގިނަ ކޮރަޕްޝަންގެ މައްސަލަތަކެއް ވަނީ ފެންމަތިވެފަ އެވެ. އޭގެ ތެރޭގައި ހުޅުމާލެއިން ނު އަގުގައި ގޯތިތައް ވިއްކުން ހިމެނެ އެވެ.
އެޗްޑީސީއަށް އާ މެނޭޖިން ޑިރެކްޓަރަކު އައްޔަންކޮށްފައިވާއިރު، ކުރިން ހުންނެވި މެނޭޖިން ޑިރެކްޓަރު އިބްރާހިމް ފަޒުލް ރަޝީދާއި ބޯޑު މެންބަރުންގެ މައްޗަށް ކޮރަޕްޝަންގެ ގިނަ ތުހުމަތުތަކެއް ވަނީ އަމާޒުވެފަ އެވެ.
ފަޒުލް އިސްތިއުފާ ދެއްވުމުން އެޗްޑީސީގެ އެމްޑީގެ މަގާމު ދެއްވީ ޑރ. މައުރޫފް ޖަމީލަށެވެ.
ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި މުހައްމަދު ފަޒީލް ރަޝީދަށް ހުޅުމާލޭ ފޭސް ދޭކުން ބިމެއް ދިންކަމުގެ މައްސަލަ ތިލަވުމާ ފަޒުލް އާއި ފަޒީލް ވެސް ސަސްޕެންޑްކުރި އެވެ. އޭގެ އިތުރުން ތަހުގީގަށް ގިނަ ބައެއްގެ ޕާސްޕޯޓު ވެސް މިހާރު ވަނީ ހިފަހައްޓައިފަ އެވެ.
މައްސަލަަތައް ފެންމަތިވީ، ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި އޭނާއަށް ގޯތީގެ ރަޖިސްޓްރީއެއް ހަދައިދީފައި އޮތްކަން ފަޅާއެރުމުންނެވެ. އޭނާގެ އިތުރުން އަދި އެހެން ބަޔަކަށް ވެސް އެގޮތަށް ރަޖިސްޓްރީ ހަދާފައިވާކަން ފަޅާއެރި އެވެ.
ގޯތި ލިސްޓުގެ ބޭރުން ގޯތިތަކެއް ދިންކަން ފެންމަތިވެފައިވަނީ އެ ސްކީމުގެ ދަށުން ގޯއްޗަށް ޝަރުތު ހަމަނުވާ ބަޔަކަށް ހުޅުމާލެ އިން ގޯތިތަކެއް އެޗްޑީސީން ދޫކޮށްފައި ވަނިކޮށް، އޭގެ ތެރެއިން ދެ ބިމެއްގެ އިންފާރު ރޭނުމުގެ ހުއްދަ އަށް އެދި އެޗްޑީސީން ހައުސިން މިނިސްޓްރީ އަށް ފޮނުވި ސިޓީއެއް ސޯޝަލް މީޑިއާގައި އާންމުވުމުންނެވެ.
އެ ސިޓީގައިވާ ގޮތުން ގޯތީގައި ފާރު ރޭނުމުގެ ހުއްދަ އަށް އެދިފައިވަނީ ފަޒުލްގެ ބޭބެ ފަޒީލް އާއި އަބްދުލްމަޖީދު މާހިރު ކިޔާ ދިއްދޫ މީހަކަށެވެ.
އެޗްޑީސީން ފޮނުވި ސިޓީއާ ގުޅިގެން ހައުސިން މިނިސްޓްރީން ދިން ޖަވާބުގައި ބުނީ އެ ގޯތިތަކަކީ އެއްވެސް ބަޔަކާ އެ މިނިސްޓްރީން ހިންގި ސްކީމުގެ ދަށުން ހަވާލުކޮށްފައި ހުރި ގޯތިތަކެއް ނޫން ކަމަށެވެ.
