މާލޭގައި ޒަމާނުއްސުރެ ކުޅެމުން އައި މާލޭ ޓީމުތަކުގެ އެއްވަނަ ޑިވިޝަނުގެ ފޯރި ކެނޑި، އަދި އަހަރަކަށްވުރެ ގިނަ ދުވަހު ފުޓްބޯޅަ ހުއްޓިފައި އޮތުމަށް ފަހު، އަތޮޅުތަކުގެ ޓީމުތައް ހިމަނައިގެން ފެށި ގޯލްޑް ކަޕާއެކު ފުޓްބޯޅައިގެ ފޯރިވަނީ އެނބުރި އައިސްފައެވެ.
ގޯލްޑް ކަޕަށް އިޝާރާތްކޮށް ގައުމީ ޓީމުގެ ކޯޗު ބުނީ މި މުބާރާތުން ގައުމީ ފެންވަރުގެ ކުޅުންތެރިން ފެނިގެން ގޮސްފައިވާ ކަމަށެވެ.
"ވަރަށް ރަނގަޅު ކުޅުންތެރިން އެބައުޅޭ، ރަނގަޅު ފޯރިއެއް އުފެދިއްޖެ" ސުޒޭން ބުންޏެވެ. ސުޒޭންވަނީ މި މުބާރާތުގައި އައްޑޫ ޓީމު ލީޑު ކުރާ ގައުމީ ޓީމުގެ ކުރީގެ ކުޅުންތެރިޔާ ޝަމްވީލް ގާސިމްގެ ކުޅުމަށް ތައުރީފު ކޮށްފައެވެ. ޝަމްވީލްގެ އުމުރަކީ މިހާރު 42 އަހަރެވެ.
"ބޮންޑާގެ ކުޅުން އަދިވެސް ވަރަށް މޮޅު. ގައުމީ ޓީމުގެ އެހެން ކުޅުންތެރިންވެސް މޮޅަށް ކުޅެފި. މެސީ އަދި ފޭދޫ އިއްބެގެ ނުފޫޒު ގަދަ. އަދި ޓީމެއްގެ ގޮތުގައި އަލިފުށި މޮޅަށް ކުޅެފި"
ގޯލްޑްކަޕާއެކު މުޅި ރާއްޖެ ތަމްސީލްވާ ގޮތައް ހޯމް އެންޑް އަވޭ އުސޫލުން ގައުމީ ލީގެއް ފެށުމުގެ މުހިއްމު ކަމުގެ އަޑުވަނީ އާއްމުންގެ ތެރޭގައި ގަދަވެފައެވެ. ގިނަ ބަޔަކު ގަބޫލު ކުރާ ގޮތުގައި ގައުމީ ލީގު ޕްރައިވެޓައިޒް ކުރުމަށް ފަހު ލީގު ހިންގުމުގެ ހުރިހާ ރައިޓްސްއެއް ހިންގާ ފަރާތްތަށް ދިނުން މުހިއްމެވެ. އަދި މިއީ އެފްއޭއެމްގެ ހިންގުމުގައި ހުރިހާ ޒޯނެއް ނުވަތަ ސަރަހައްދެއް ބައިވެރި ކުރެވޭނެ ނިޒާމެއް އުފަން ކުރުވަންވީ ވަގުތު ކަމަށް ގިނަ ބަޔަކު ދެކެއެވެ.
