މިހާރު ހިނގަމުންދާ ގޯލްޑްކަޕް ފުޓްބޯޅަ މުބާރާތުގައި ރާއްޖޭގެ އަތޮޅުތަކުން އައި ޓީމުތަކާއެކު ފުޓްބޯޅައިގެ ފޯރިވަނީ ގަދަވެފައެވެ. ގޯލްޑްކަޕާއެކު މުޅި ރާއްޖެ ތަމްސީލްވާ ގޮތައް ހޯމް އެންޑް އަވޭ އުސޫލުން ގައުމީ ލީގެއް ފެށުމުގެ މުހިއްމުކަން ބޮޑު ކަމަށް ގިނަ ބަޔަކު ދެކެއެވެ.
ގިނަ ބަޔަކު ގަބޫލު ކުރާ ގޮތުގައި ގައުމީ ލީގު ޕްރައިވެޓައިޒް ކުރުމަށް ފަހު ލީގު ހިންގުމުގެ ހުރިހާ ރައިޓްސްއެއް ހިންގާ ފަރާތްތަށް ދިނުން މުހިއްމެވެ. އަދި މިއީ އެފްއޭއެމްގެ ހިންގުމުގައި ހުރިހާ ޒޯނެއް ނުވަތަ ސަރަހައްދެއް ބައިވެރި ކުރެވޭނެ ނިޒާމެއް އުފަން ކުރުވަންވީ ވަގުތު ކަމަށް ގިނަ ބަޔަކު ދެކެއެވެ.
ގޯލްޑްކަޕް ފުޓްބޯޅަ މުބާރާތުގެ ފައިނަލް މެޗު މިރޭ ކުޅެވޭއިރު، ދެކެން ބޭނުންވާ ހުވަފެން މި ފެންނަނީ ކަމަށް ސާފް ޗެމްޕިއަންޝިޕް އެންމެ ފުރަތަމަ ކާމިޔާބު ކުރި، ދިވެހި ގައުމީ ޓީމުގެ މެނޭޖަރު މުހައްމަދު ހާނިމްވެސް ވަނީ ވިދާޅުވެފައެވެ. ހާނިމް ވިދާޅުވީ، މިއީ ފުޓްބޯޅައަށް އިންގިލާބީ ބަދަލެއް އައި މުބާރާތެއް ކަމަށެވެ. އަދި ސަޕޯޓަރުންނާއެކު ދަނޑުން ފެންނަނީ އުފާވެރިކަންކަން ފާހަގަކޮށް، ހާނިމް ވިދާޅުވީ މި ފޯރި ނުކެނޑޭނެ ގޮތަކަށް ކުރިއަށް ހުރި މުބާރާތްތައްވެސް ރާވަން ޖެހޭ ކަމަށެވެ.
މި ފުޓްބޯޅަ ފޯރި ނުކެނޑޭ ގޮތަށް އަލުން ފުޓްބޯޅަ ކުރިއަށް ގެންދެވޭނެ ފޯމެޓަކީ މުޅި ރާއްޖެ ތަމްސީލްވާ ގޮތައް ހޯމް އެންޑް އަވޭ އުސޫލުން ގައުމީ ލީގެއް ކުރިއަށް ގެންދިޔުމެވެ.
