މީހަކު ރަހީނުކޮށް، އޭނާގެ ބޯ ބާލައި، އިނގިލި ބުރިކުރަން އުޅެނިކޮށް ފުލުހުން ހިންގި ބޮޑު އޮޕަރޭޝަންގައި ހައްޔަރު ކުރި ގްރޫޕުގެ ތެރެއިން، ކޯޓު ހުރުމަތް ކެނޑި މައްސަލައިގައި މަސް ދުވަހަށް ޖަލަށްލާން ހުކުމްކޮށްފައިވަނީ، ގ. ސެމިޓޯން އިބްރާހީމް ޝަރީފް އެވެ.
އިބްރާހިމް ޝަރީފް، ކޯޓު ހުރުމަތް ކަނޑައިގެން ޖަލަށްލާން ހުކުމް ކުރީ، މަސްތުވާތަކެތީގެ މައްސަލައެއްގައި އޭނާ ހައްޔަރުކޮށް ކޯޓަށް ހާޒިރުކުރުމުން، ބަންދު މަޖިލީހުގައި ދެއްކި ވާހަކަތަކަކާ ގުޅިގެންނެވެ. މަސްތުވާތަކެތީގެ މައްސަލައިގެ ތުހުމަތުގައި އިބްރާހީމް ޝަރީފް 15 ދުވަހަށް ބަންދު ކުރަން ކޯޓުން އަމުރުކުރިއިރު، ގާޒީ ގަބޫލު ނުކުރާ ކަމަށް ބުނެ އަދި ބަންދު މަޖިލީހުގައި ހަޑިހުތުރު ބަހުން ވާހަކަ ދެއްކި މައްސަލައާ ގުޅިގެން އޭނާގެ މައްޗަށް މަސް ދުވަހުގެ ޖަލު ހުކުމެއް އިއްވި އެވެ.
ހިޔާ ފްލެޓުގެ އެޕާޓްމަންޓެއްގައި މީހަކު ރަހީނު ކުރުމަށްފަހު އެ މީހާގެ އިނގިލި ބުރިކޮށްލަން އުޅުނު މައްސަލާގައި އިބްރާހީމް ޝަރީފް ހައްޔަރުކޮށްފައިވަނީ މައުލޫމާތު ލިބިފައިވާ ގޮތުގައި މިދިޔަ ހަފްތާގަ އެވެ. އެ މައްސަލައާ ގުޅިގެން އެ މީހުންގެ މައްޗަށް ދައުވާ ކުރަން ފޮނުވާފައިވާކަން ހާމަވީ މި ހަފްތާގަ އެވެ.
