Rajje in palestine ge 2 hospital akah fen foaru kohdheefi

ހަބަރު / އިސްލާމިކް މިނިސްޓްރީ

ރައީސް މުއިއްޒާއި ފަލަސްތީނުގެ ރައީސް މަހުމޫދު އައްބާސް ސަލާން ކުރައްވަނީ - ފޮޓޯ: ރައީސް އޮފީސް

ރާއްޖެއިން ފަލަސްތީނުގެ ދެ ހޮސްޕިޓަލަކަށް 6،000 ފެން ކޭސް ފޯރުކޮށްދީފި

ގުފްތަގް އަޖީރު

24 ޑިސެމްބަރ 2024 - 23:10:45

ދިވެހިރާއްޖޭގެ ޒަކާތު ހައުސްއިން ފޯރުކޮށްދިން އެހީގެ ދަށުން ފަލަސްތީނުގެ އަލް ޝިފާ އަދި އަލް ހަޔާތު ހޮސްޕިޓަލްގައި ތިބި ބަލިމީހުންނަށް 6،000 ފެން ކޭސް ފޯރުކޮށްދީފިއެވެ.

މި އެހީ ފޯރުކޮށްދިނުމުގެ މަސައްކަތް ކުރިއަށް ގެންދަނީ ގަތަރު ރެޑް ކްރެސެންޓުންނެވެ.

އިސްލާމީ ކަންތައްތަކާ ބެހޭ މިނިސްޓަރު މުހައްމަދު ޝަހީމް އަލީ ސައީދު ވިދާޅުވި ގޮތުގައި މި އެހީ އެއްކޮށް ނިމޭއިރު ޖުމުލަ 50،000 ފެން ކޭސް ފޯރުކޮށްދެވޭނެއެވެ. މި އެހީ ފަލަސްތީނުގެ 60،000 އަށް ވުރެ ގިނަ މުސްލިމުންނަށް ލިބޭނެއެވެ.

ޒަކާތު ހައުސްއިން މީގެ ކުރިން ހާމަކޮށްފައިވާ ގޮތުގައި ފަލަސްތީނުގެ މުސްލިމުންނަށް އެހީތެރިވުމަށް 1 ލައްކަ ޑޮލަރުގެ އެހީއެއް ދިނުމަށް ވަނީ ނިންމާފައެވެ. މިއީ ޒަކާތު ފަންޑުން ރާއްޖެއިން ބޭރުގެ ފަރާތަކަށް އެހީތެރިކަން ފޯރުކޮށްދޭ ފުރަތަމަ ފަހަރެވެ.