މިކަމާ ގުޅިގެން އެކްސްގައި ގިނަ ބަޔަކު ކަންބޮޑުވުން ފާޅުކުރަމުން ދިޔައިރު، މި މައްސަލައިގެ ހަގީގަތް ހާމަކޮށްދެއްވަމުން މިނިސްޓަރު އިހުސާން ވަނީ 2021 ވަނަ އަހަރުގެ މޭ މަހު ބަންގްލަދޭޝްގެ ނޫހެއްގައި މި ހާދިސާ ރިޕޯޓުކޮށްފައިވާ އާޓިކަލްގެ ލިންކު ވެސް ހިއްސާކުރައްވާފައެވެ.
މި މައްސަލައާ ގުޅިގެން މޯލްޑިވްސް ޕޮލިސް ސަރވިސްއިން ބުނީ މާލޭގައި މިފަދަ އެއްވެސް މައްސަލައެއް ހިނގާފައި ނުވާ ކަމަށާއި، އަދި އެފަދަ މައްސަލައެއް ފުލުހުންނަށް ހުށަހެޅިފައިވެސް ނުވާ ކަމަށެވެ.
ފުލުހުން ބުނަނީ ކީކޭ؟
ނޮވެމްބަރު 9 ވަނަ ދުވަހު އައިޖީއެމްއެޗްގައި ނޭޕާލްގެ އަންހެނަކު ނިޔާވެފައިވާ ކަމަށާއި އޭނާއަށް ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަ ނުކުރެވޭ ކަމަށް ފުލުހުން ބުނެއެވެ.
ބިދޭސީ އަންހެނަކު ގޭންގަކުން ރޭޕްކޮށް މަރާލާފައިވާ ކަމަށް ބުނެ ބަޔަކު ދަނީ ވާހަކަ ފަތުރަމުންނެވެ. ބައެއް ޕޯސްޓްތަކުގައި ބުނަނީ އެއީ އިންޑޮނޭޝިއާ އަންހެނެއް ކަމަށެވެ. ބައެއް ޕޯސްޓްތަކުގައި ނޭޕާލް މީހެއް ކަމަށް ވެސް ބުނެފައިވެ އެވެ.
އުމުރުން 25 އަހަރުގެ ކަންޗަލް ދުގެލް ނިޔާވެފައިވާ މައްސަލަ ފުލުހުންނަށް ރިޕޯޓްކޮށްފައި ވަނީ ނިމުނު ނޮވެމްބަރު، 9 ވަނަ ދުވަހުގެ ހެނދުނު ކަމަށް ފުލުހުން ބުނެ އެވެ.
ފުލުހުން ކުރިއށް ގެންދިޔަ ތަހުގީގަށްފަހު އެނގިފައިވަނީ ކަންޗަލް ދުގެލް، ހޮސްޕިޓަލަށް ގެނެވިފައިވަނީ ވަރަށް ބޮޑަށް ބަނޑުގައި ރިއްސަން ފެށުމާ ގުޅިގެން ކަމަށެވެ. އަދި ހޮސްޕިޓަލަށް ގެނައުމުގެ މަގުމަތީގައި އޭނާގެ ހަބަރު ހުސްވިކަން ފާހަގަވެފައިވާކަން ވެސް ފުލުހުން ބުނެ އެވެ.
ކަންޗަލްގެ މެޑިކަލް ލީގަލް ރިޕޯޓްގައި އޭނާ މަރުވި ސަބަބު "އަންނޯން" ކަމަށް ބަޔާންކޮށްފައި ވާކަން ވެސް ފުލުހުން ފާހަގކުރެއެވެ.
އޭނާގެ ހަށިގަނޑާ ސްޕޮންސާގެ ފަރާތުން ހަވާލުވެފައި ނުވާތީ ހަށިގަނޑު މޯޗަރީއަށް ގެންގޮސްފައިވަނީ ފުލުހުންގެ ބެލުމުގެ ދަށުން ކަމަށާއި މައްސަލަ ތަހުގީގު ކުރަމުންދާ ކަމަށް ފުލުހުން ވަނީ ބުނެފަ އެވެ.
- ސޯޝަލް މީޑިއާގައި ދައުރުވާ ވީޑިއޯއަކީ 2021 ގެ ބަންގްލަދޭޝްގެ ހާދިސާއެއް
- ހޯމްލޭންޑް މިނިސްޓަރު އަލީ އިހުސާން ވަނީ މި މައްސަލައިގެ ހަގީގަތް ހާމަކުރައްވާފަ
- މާލޭގައި މިފަދަ އެއްވެސް މައްސަލައެއް ހިނގާފައި ނުވާކަން ފުލުހުން ކަށަވަރުކޮށްދީފައިވޭ
- އަސްލު ހާދިސާގެ ނޫސް އާޓިކަލްގެ ލިންކު މިނިސްޓަރު ވަނީ ހިއްސާކުރައްވާފައި
