ގޯލްޑްކަޕާއެކު މުޅި ރާއްޖެ ތަމްސީލްވާ ގޮތައް ހޯމް އެންޑް އަވޭ އުސޫލުން ގައުމީ ލީގެއް ފެށުމުގެ މުހިއްމުކަމުގެ އަޑުތައް އާއްމުންގެ ތެރޭގައިވަނީ ގަދަވެފައެވެ.
ގޯލްޑްކަޕާއެކު މުޅި ރާއްޖެ ތަމްސީލްވާ ގޮތައް ހޯމް އެންޑް އަވޭ އުސޫލުން ގައުމީ ލީގެއް ފެށުމުގެ މުހިއްމުކަން ބޮޑު ކަމަށް ގިނަ ބަޔަކު ދެކެއެވެ. ގިނަ ބަޔަކު ގަބޫލު ކުރާ ގޮތުގައި ގައުމީ ލީގު ޕްރައިވެޓައިޒް ކުރުމަށް ފަހު ލީގު ހިންގުމުގެ ހުރިހާ ރައިޓްސްއެއް ހިންގާ ފަރާތްތަށް ދިނުން މުހިއްމެވެ.
މިއީ އެފްއޭއެމްގެ ހިންގުމުގައި ހުރިހާ ޒޯނެއް ނުވަތަ ސަރަހައްދެއް ބައިވެރި ކުރެވޭނެ ނިޒާމެއް އުފަން ކުރުވަންވީ ވަގުތު ކަމަށް ގިނަ ބަޔަކު ދެކެއެވެ. ލީގުގައި ވެސް ކޮންމެ ވެސް ދުވަހަކުން ހޯމް އެންޑް އަވޭ އުސޫލުން ލީގު ކުޅެވޭނެ ދުވަހެއް އަންނަން ޖެހޭ ކަމަށް، ގޯލްޑް ކަޕްގެ ޗެމްޕިއަންކަން ހޯދި އޭދަފުށީ ޓީމުގެ ކެޕްޓަން، އިޝާން އިބްރާހިމް (ސައްޓު) ވެސްވަނީ ބުނެފައެވެ.
ގޯލްޑްކަޕް ފުޓްބޯޅަ މުބާރާތަކީ، ރަނގަޅު ފެށުމެއް ކަމަށާއި ކުރިއަށް އޮތްތަނުގައި މިހާރަށްވުރެ ހަރުދަނާކޮށް މި ކޮންސެޕްޓް ކުރިއަށްދާނެ ކަމަށް އުއްމީދު ކުރައްވާ ކަމަށް ދިވެހި ކުޅިވަރުގެ ޒުވާން ހިދުމަތްތެރިޔާ، އޮލިމްޕިކް ކޮމިޓީގެ ކުރީގެ ޖެނެރަލް ސެކެއްޓްރީ އަހްމަދު މަރުޒޫގުވެސް ވިދާޅުވިއެވެ.
ކެނޑިފައި ފުޓްބޯޅައިގެ ފޯރި، ގޯލްޑްކަޕާ އެކު އަލުން އައިސްފައިވާއިރު، މި މުބާރާތާއެކު ފުޓްބޯޅައިގެ ސިޔާސަތު ބަދަލުވާނެ ކަމަށް އުއްމީދު ކުރައްވާކަމަށް، ކުޅިވަރު ހިންގުމުގެ ދާއިރާ އިން މަތީ ތައުލީމު ހާސިލް ކުރައްވައި އަދި އެފްއޭއެމްގެ ސެކެރެޓްރީ ޖެނެރަލްކަމުގެ އިތުރުން ކުޅިވަރާ ބެހޭ ވުޒާރާގެ ސްޓޭޓް މިނިސްޓަރު ކަން ކުރައްވާފައިވާ ހާމިދު އަބްދުލްގަފޫރުވެސްވަނީ ވިދާޅުވެފައެވެ.
