ހައުސިން މިނިސްޓްރީ އުވާލާފައިވާއިރު ސަރުކާރުން މިވަނީ ކޮންސްޓްރަކްޝަން މިނިސްޓްރީ އާއެކު ހައުސިން މިނިސްޓްރީ އެއްކޮށްލާފައެވެ. އެހެންކަމުން ދެން ކޮންސްޓްރަކްޝަން ދާއިރާގެ އިތުރުން ހައުސިންގެ ދާއިރާވެސް ބަލަހައްޓާނީ މިނިސްޓަރު ޑރ. އަބްދުﷲ މުއްތަލިބެވެ.
ކުރިން ހައުސިން އާއި އެއްކޮށް އޮތް ޕްލޭނިން ވެސް މިހާރު މިވަނީ ފިނޭންސް މިނިސްޓްރީއާ އެއްކޮށްލާފައެވެ. މިނިސްޓްރީ އޮފް ފިނޭންސް އެންޑް ޕްލޭނިން ބަލަހައްޓާނީ މިނިސްޓަރު މޫސާ ޒަމީރެވެ.
ހައުސިން މިނިސްޓަރުގެ މަގާމުގައި ހުރި ޑރ. އަލީ ހައދަރަށް މިހާރު މިވަނީ ހަޔާ އެޑިއުކޭޝަން މިނިސްޓަރުގެ މަގާމު ދީފައެވެ.
އޭގެއިތުރުން ކުރިން އެގްރިކަލްޗާ މިނިސްޓަރު ގެ މަގާމުގައި ހުރި ޑރ. އައިޝަތު ރަމީލާ ސިއްހީ ހާލަތު ގޯސްވެ އިސްތިއުފާ ދެއްވުމާ ގުޅިގެން އެ ވުޒާރާ ވަގުތީ ގޮތުން ބަލަަހައްޓަމުން ގެންދިޔައީ ކުރިން ހަޔާ އެޑިއުކޭޝަން މިނިސްޓްރީގެ މަގާމުގައި ހުރި ޑރ.މަރިޔަމް މާރިޔާއެވެ. އެގޮތުން މާރިޔާ އަށް މިހާރު މިވަނީ މިނިސްޓާ އޮފް އެގްރިކަލްޗާ އެންޑް އެނިމަލް ވެލްފެއާގެ މަގާމު ދެއްވާފައެވެ.
