އައްޑޫ ސިޓީ ބަލިކޮށް ގޯލްޑްކަޕް މުބާރާތް ކާމިޔާބު ކުރި އޭދަފުށީ ޓީމު ތަށި ހިފައިގެން ރަށަށް ދިޔައީ މިއަދު މެންދުރު ފަހުއެވެ. ޓީމު ރަށަށް ދިޔުމުން ރަށުގެ ކުދިބޮޑު އެންމެންވަނީ ޓީމަށް މަރުހަބާ ކިޔާފައެވެ.
އޭދަފުށިން ގޯލްޑް ކަޕް ކާމިޔާބު ކުރީ، އައްޑޫ ސިޓީގެ މައްޗަށް ކުރި ހޯދައިގެންނެވެ. 17 ޓީމުން ވާދަކުރި މުބާރާތުގެ ޗެމްޕިއަންކަން އޭދަފުށިން ހޯދީ ފައިނަލްގައި ދެ ލަނޑު ސުން ލަނޑުން އައްޑޫ ސިޓީ ބަލިކޮށްގެނެވެ. ފައިނަލް މެޗުގައި އޭދަފުށީގެ ލަނޑުތައް ޖެހީ މުހައްމަދު ފާސިރު އަދި އަލީ ފާސިރުއެވެ.
މުޅި ރާއްޖެއަށް ހުޅުވާލައިގެން ބޭއްވި ގޯލްޑްކަޕްގެ ޗެމްޕިއަންކަން އޭދަފުށިން ހޯދިއިރު، މުޅި ރާއްޖެއަށް ހުޅުވާލައިގެން ބާއްވާ ފުޓްސަލް މުބާރާތް ކަމަަށްވާ ގޯލްޑަން ފުޓްސަލްގެ މި އަހަރުގެ ޗެމްޕިއަނުންނަކީވެސް ބ. އޭދަފުށްޓެވެ. އޭދަފުށިންވަނީ 2016 ވަނަ އަހަރު މިނިވަން ޗެމްޕިއަންޝިޕްވެސް ކާމިޔާބުކޮށްފައެވެ.
