ސައިކަލެއްގައި ރޯކޮށްލި މައްސަލައިގައި، ޓެރަރިޒަމްގެ ދައުވާ އުފުލައި 15 އަހަރުގެ ޖަލު ހުކުމެއް އިއްވާފައިވަނިކޮށް، ސައިކަލެއް ވަގަށް ނަގައިގެން ހައްޔަރުކޮށް ބަންދު މުއްދަތަށް 15 ދުވަސް ޖެހި މީހަކީ، ހ. ރެދަން ފަވާޒް ކަޅުތުއްތު އެވެ.
ޖިނާއީ އެކި މައްސަލަތަކުގައި އެކި ފަހަރު މަތިން ފަވާޒް ކަޅުތުއްތު ހައްޔަރުކޮށްފައިވާކަމަށް ރެކޯޑްތަކުން ދައްކައެވެ. އޭގެ ތެރޭގައި މަސްތުވާތަކެތީގެ މައްސަލަތަކާއި ވައްކަމާއި ފޭރުން ފަދަ މައްސަލަތައްވެސް ހިމެނެ އެވެ.
ފަވާޒު ކަޅުތުއްތުގެ މައްޗަށް 15 އަހަރުގެ ޖަލު ހުކުމެއް އިއްވާފައިވަނީ ރައީސް ނަޝީދުގެ ވެރިކަން ބަދަލުވުމަށްފަހު ހިނގައިދިޔަ ކަންތައްތަކުގެ ތެރޭގައި ފުލުހެއްގެ ސައިކަލެއްގައި ރޯކޮށްލި މައްސަލައިގައި ޓެރަރިޒަމްގެ ދައުވާ ސާބިތުވެގެންނެވެ. އޭނާގެ މައްޗަށް ޓެރަރިޒަމްގެ ދައުވާ އުފުލާފައިވަނީ 2012 ވަނަ އަހަރުގެ ޖޫން މަހު އެވެ. އަދި އޭނާގެ މައްޗަށް އެ މައްސަލައިގައި 15 އަހަރުގެ ޖަލު ހުކުމެއް އިއްވީ 30 އޮގަސްޓް 2012 ގައެވެ.
ރައީސް ނަޝީދުގެ ވެރިކަން ބަދަލުވުމަށް ފަހު އައި، ފުރަތަމަ ރިޔާސީ ބަޔާން އިއްވުމާ ދިމާކޮށް އެމްޑީޕީން މާލޭގައި ކުރި މުޒާހަރާގައި ފުލުހެއްގެ ސައިކަލެއްގައި ރޯކޮށްލިކަން ޝަރީއަތަށް ސާބިތުވެ ފަވާޒު ކަޅުތުއްތު 15 އަހަރަށް ޖަލަށް ލުމަށް ކުރި ހުކުމް އޭނާގެ ފަރާތުން ހައިކޯޓުގައި އިސްތިއުނާފްވެސް ކުރި އެވެ. އެހެންނަމަވެސް 2013 ވަނަ އަހަރުގެ ޖޫން މަހު ހައިކޯޓުން ވަނީ ފަވާޒް ކަޅުތުއްތު ޖަލަށްލާން ކުރި ހުކުމަށް ތާއީދުކޮށްފަ އެވެ.
