ކްލަބަށް ފާޑު ކިޔައިގެން، ކްލަބުގެ ކޮންޓްރެކްޓް ބާތިލުކޮށްފައިވާ ރޮނާލްޑޯ، ދުބާއީގައި ވާހަކަ ދައްކަމުން ބުނީ މެންޗެސްޓަރ ޔުނައިޓެޑަށް ދިމާވެފައިވާ މައްސަލައަކީ ކޯޗުގެ މައްސަލައެއް ނޫން ކަމަށެވެ. ރޮނާލްޑޯގެ ކޮންޓްރެކްޓް ބާތިލުކުރިއިރު ހުރި ކޯޗު އެރިކް ޓެން ހޭގް މަގާމުން ވަކިކުރުމަށް ފަހު އާ ކޯޗެއް ގެނެސްގެންވެސް ޔުނައިޓެޑު އުޅެނީ ހާލު ބޮޑުކޮށެވެ.
ރޮނާލްޑޯ ބުނީ އެ ކްލަބަށް ކުރިމަތިވެފައިވާ މައްސަލައަކީ ކޯޗުގެ މައްސަލައެއް ނޫން ކަމަށާއި ކިތަންމެ ވަރަކަށް ކޯޗުން ބަދަލުކުރި ނަމަވެސް އަސްލު މައްސަލަ ހައްލު ނުކޮށް އެ ކްލަބަށް ކުރިމަތިވެފައިވާ މައްސަލަ ރަގަޅު ނުކުރެވޭނެކަމަށެވެ. ރޮނާލްޑޯވަނީ ޔުނައިޓެޑުގައި ބޮޑެތި މައްސަލަތަކެއް ހުރިކަން ފާހަގަކޮށްފައެވެ.
ޔުނައިޓެޑަށް ކުރިން ކުޅުނު ބައެއް ނަން މަޝްހޫރު ކުޅުންތެރިންވެސްވަނީ ކްލަބުގައި ބޮޑެތި މައްސަލަތެއް ހުރިކަން ފާހަގަކޮށްފައެވެ. އަދި އެކަންކަމަށް އެޑްރެސް ނުކޮށް ކާމިޔާބު ނުވާނެ ކަމަށް ބުނެފައިވެއެވެ.
