އެމްޑީޕީން ވަނީ އެފަދައިން ބުނެ ނޫސްބަޔާނެއް ނެރެފަ އެވެ. އެމްޑީޕީން އެފަދައިން ބުނެ ބަޔާނެއް ނެރެފައި މިވަނީ ރޯޑް ޑިވެލޮޕްމެންޓް ކޯޕޮރޭޝަން ގެ ކުރީގެ އެމްޑީ މޫސާ އަލިމަނިކު ދިރިއުޅޭ ގެއަށް އިއްޔެ ދަންވަރު ފުލުހުން ވަނުމާ ގުޅިގެން އިދިކޮޅުން ކަންބޮޑު ފާޅުކުރަމުންދާ ވަގުތުގަ އެވެ.
ފުލުހުން، މޫކޭ ދިރިއުޅޭ ގެއަށް ވަނީ (އާރްޑީސީ)ގެ ކޮރަޕްޝަނާއި ހިޔާނާތުގެ މައްސަލަތަކަކާ ގުޅިގެން ފުލުހުން ކުރަމުން އަންނަ ތަހުގީގަކަށް ހެކި ހޯދުމަށެވެ.
ފުލުހުން އެ ތަހުގީގުތަކަށް، މޫކޭ ދިރިއުޅޭ ގެއަށް ވަނީ އޭނާ އާއި އޭނާގެ އާއިލާ ނިދާފައި ތިއްބާ ކަމަށާއި މި ހާދިސާއަކީ އިދިކޮޅު ފަރާތްތަކަށް އަމާޒުކޮށްގެން ބިރުދެއްކުމާއި އުނދަގޫކުރުމުގެ މިސާލެއްކަން އެމްޑީޕީން ފާހަގަކުރެ އެވެ. އަދި އެމްޑީޕީން ބުނީ ރައީސް ޑރ. މުއިއްޒުގެ ވެރިކަމުގައި ޑިމޮކްރެޓިކް އުސޫލުތައް ހަލުވިކަމާއިއެކު ދަށަށް ގޮސް އަސާސީ ހައްގުތަކަށް އިހުތިރާމް ކުރުމާ މެދު ސީރިއަސް ކަންބޮޑުވުންތަކެއް އުފެދިފައި ވާކަމަށެވެ.
އެމީހުންގެ އަމަލުގެ ސަބަބެއްގެ ގޮތުގައި ސަރުކާރުން ބޭނުންކުރާ ބަސްމަގު ބިނާވެފައިވަނީ އެމްޑީޕީގެ މެންބަރުންނާއި އިދިކޮޅު އެހެން މެމްބަރުންގެ އަބުރު ބަދުނާމުކުރާ މުޅިން ސާބިތު ނުހިމެނޭ ވާހަކަތަކެއްގެ މައްޗައްކަން އެމްޑީޕީން ބުނެއެވެ. މޫކޭގެ އިތުރުން އެމްޑީޕީގެ އިތުރު އެހެން އިސްފަރާތްތަކާ މެދުވެސް އެފަދަ ގޮތަކަށް އަމަލުކޮށްފައިވާކަން އެ ޕާޓީން ނެރުނު ބަޔާނުގައި އަލިއަޅުވާލި އެވެ.
ކޮރަޕްޝަންގެ ތަހުގީގުތަކާ ގުޅިގެން މޯލްޑިވްސް ޕޮލިސް ސާވިސްގެ ދާދި ފަހުން އަމިއްލައަށް ހިޔާރުކޮށްގެން ގައުމުގެ އޯވަސައިޓް މެކޭނިޒަމްގެ އިންޓެގްރިޓީގެ ތެރޭގައި އިތުރު ކޮމްޕްރޮމައިޒްތަކެއް އަލިއަޅުވާލުމާއި މިނިވަން މުއައްސަސާތަކަށް އާންމުންގެ އިތުބާރު ދަށްވުމަކީ ހަމަ އެހާމެ ކަންބޮޑުވާކަމެއްކަން އެމްޑީޕީން ފާހަގަކުރެ އެވެ.
އެމްޑީޕީން ވަނީ ސިޔާސީ ގޮތުން އިދިކޮޅު ޕާޓީތަކުގެ މެމްބަރުންނަށް ސަރުކާރުން ކުރަމުންދާ އަނިޔާ ހުއްޓާލުމަށް އަމުރުކޮށް ގޮވާލާފަ އެވެ. އަދި ސަރުކާރުން ޑިމޮކްރެސީގެ ގަވައިދުތަކާ އުސޫލުތަކަށް ތަބާވުމަށްވެސް އެމްޑީޕީން ގޮވާލަ އެވެ.
