ކަސްޓަމްސް އިން ބުނީ ހައްޔަރުކޮށްފައިވަނީ 41 އަހަރުގެ ދިވެހި ފިރިހެނަކާއި 21 އަހަރުގެ ދިވެހި ފިރިހެނެއް ކަމަށެވެ.
ކަސްޓަމުން ބުނީ، އެ ދެމީހުންގެ އަމަލުތައް ހުރި ގޮތުން ޝައްކު ކުރެވިގެން އިތުރަށް ބަލައިފާސް ކުރުމުގެ ތެރެއިން، ދެ މީހުންގެ ހަށިގަނޑުގައި މަސްތުވާތަކެތި ރައްކާކޮށްފައި ހުއްޓައި ފެނިފައިވާ ކަމަށެވެ.
ފުރަތަމަ މަރުހަލާގައި އެ ތަކެތި ތަހުލީލުކުރިއިރު، މަސްތުވާތަކެތީގެ ދެ ބާވަތެއް ކަމަށްވާ ހެރޮއިން އަދި މެފެޑްރޯންއަށް ޕޮޒިޓިވްވެފައިވާ ކަމަށާއި އެއީ 0.32 ކިލޯގެ ހެރޮއިންއާ 2.1 ކިލޯގެ މެފެޑްރޯން ކަމަށް ކަސްޓަމްސް އިން ބުނެ އެވެ.
އެ ތަކެތީގެ ބަރުދަނުގައި 2.4 ކިލޯ ހުރިކަމަށާއި، އެ ތަކެތީގެ މަގުމަތީ އަގު، 5.5 މިލިއަން ރުފިޔާއަށް އަރާނެ ކަމަށް ކަސްޓަމްސް އިން ލަފާކުރެ އެވެ.
ކްރިމިނަލް ކޯޓުން ވަނީ މި ދެ މީހުންގެ ބަންދަށް 15 ދުވަސް ޖަހައިފަ އެވެ. ބަންދު އަމުރުގައިވާ ގޮތުން މި ދެ މީހުންގެ ރާއްޖެ އައިރު އަރައިގެން ހުރި އިސްޓާކީނުގެ ތެރެއިންނާއި ބޮކްސާ ތެރެއިން ޑްރަގް ފެނިފައިވެ އެވެ.
އަތުލައިގަތް ޑްރަގާއި އެތަކެތި އެތެރެކުރި ދެ މީހުން ފުލުހުންނާ ހަވާލުކޮށްފައިވާ ކަމަށް ކަސްޓަމްސް އިން ބުނެ އެވެ.
