ލަފާއެއްގެ ގޮތުން މިނިސްޓްރީ އިން ކަސްޓަމްސްއަށް ފޮނުވި ސިޓީގައި ވަނީ ރާއްޖޭގައި އެއްވެސް މިންވަރަކަށް ދުންފަތާއި ދުންފަތުގެ ބާވަތްތައް އުފެއްދުމަކީ މަނާކަމެއް ކަމަށް ގާނޫނުގައި ބުނާއިރު، ދުންފަތާއި ދުންފަތުގެ ތަނޑިއާއި ނިކޮޓިން ހިމަނައިގެން، އޭގެ މާއްދާއެއް ހަށިގަނޑަށް ވާސިލުވާ ގޮތަށް ތައްޔާރުކޮށްފައިވާ ކޮންމެ އެއްޗަކީ ދުންފަތުގެ ބާވަތެއް ކަމަށެވެ.
އެހެންވެ، ދުންފަތުގެ ބާވަތެއް އުފެއްދުމަކީ މަނާކަމެއް ކަމުގައިވާތީ، ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ އެއްޗެއް ނުވަތަ އާލާތެއް އެއްވެސް ފަރާތަކުން އެތެރެކޮށްފި ނަމަ އެތަކެތި ހިފަހައްޓައި ނައްތާލުމަށް ހެލްތު މިނިސްޓްރީން ވަނީ އަންގައިފަ އެވެ.
އަމިއްލައަށް ހަދާ ސިނގިރޭޓުގައި ބޭނުންކުރާ ތަކެތީގެ ތެރޭގައި ސިނގިރޭޓަށް ހާއްސަ ދުންފަތާއި އޮޅާ ކަރުދާހާއި ފިލްޓަރު ހިމެނެ އެވެ.
ސަރުކާރުން މިފަހުން ވަނީ ދުންފަތް ކޮންޓްރޯލް ކުރުމުގެ ގޮތުން ގާނޫނަށް އިސްލާހުގެނެސް ދުންފަތުން ނަގަމުން ދިޔަ ޓެކްސް ބޮޑުކޮށްފަ އެވެ. އެގޮތުން ކުރިން 100ރ އަށް ލިބުނު ސިނގިރޭޓު ފޮށްޓެއް މިހާރު ގަންނަން ލިބެނީ 230ރ އަށެވެ.
ދިވެހި ދުންފަތާ ދުރުކޮށް ދުޅަހެޔޮ ސިއްހަޔަށް މަގުފަހި ކުރުމުގެ ގޮތުން މިދިޔަ މަހުގެ 15 އިން ފެށިގެން ވޭޕް ކުރުން ވެސް ވަނީ މުޅިން މަނާކޮށްފަ އެވެ. އެހެންވެ އެކަމާ ހިލާފުވާ ފަރާތްތައް ބޮޑެތި އަދަދުތަކުން ޖޫރިމަނާ ވެސް ކުރެވޭނެ އެވެ.
