ރޭގެ ވަގުތެއްގައި ވެސް ނަރުދޫއަށް ވަނީ ވަރަށް ބޮޑަށް ރާޅު އަރާފަ އެވެ.
އެމްއެންޑީއެފް އިން ބުނެފައިވަނީ ރަށުގައި ފެން ބޮޑުވެފައިވާތީ އެހީތެރިކަން ފޯރުކޮށްދިނުމުގައި، އެމްއެންޑީއެފް ނޮދަން އޭރިއާ ކޮމާންޑުން ސިފައިން ހަރަކާތްތެރިވަމުން ދާ ކަމަށެވެ.
ބޯކޮށް ވާރޭ ވެހި މާލޭގެ ބައެއް މަގުތަކުގައި ފެންބޮޑުވުމާ ގުޅިގެން، ފެން ހިންދުމުގައި އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ވަނީ ބުރާސްފަތި ދުވަހާއި ހުކުރު ވިލޭރޭ ހަރަކާތްތެރިވެފަ އެވެ.
އެމްއެންޑީއެފް އިން ބުނެފައި ވަނީ ހުކުރު ވިލޭރޭ މާލޭގެ ތިން ސަރަހައްދެއްގައި ޕަންޕު ބޭނުންކޮށްގެން ފެން ހިންދުމުގެ މަސައްކަތް ކޮށްފައިވާ ކަމަށެވެ.
ނަރުދޫ ކައުންސިލްގެ ރައީސް މުހައްމަދު މުސްތަރުސިދު ވިދާޅުވީ އުދަ އެރުމުގެ ސަބަބުން ރަށުގެ ވަރަށް ބޮޑު ސަރަހައްދެއްގައި ފެން ބޮޑުވެފައިވާ ކަމަށާއި ގާތްގަނޑަކަށް 12 ވަރަކަށް ގެއަށް ފެން ވަދެފައިވާ ކަމަށެވެ.
ރޭ ދިޔަވަރު ބޮޑުވި ގަޑީގައި ނަރުދު އަށް ވަރަށް ބޮޑަށް އުދަ އަރާފައިވާއިރު ނަރުދޫގެ ކުރީގެ ބަނދަރާއި އެ ބަނދަރުގެ ނެރު ވެސް އޮތީ ބޭނުން ނުކުރެވޭ ވަރަށް ހަލާކުވެފަ އެވެ.
ނަރުދޫއަށް އުދަ އަރާފައި - ފޮޓޯ:ނަރުދޫ އެމްވީ
ރާއްޖޭގެ ބޮޑު ބަޔަކަށް މި ދުވަސްކޮޅު ވަރަށް ބޮޑަށް ވިއްސާރަ ކުރަމުން ދާއިރު ހުކުރު ދުވަހު ވެސް ރާއްޖޭގެ ބައެއް ސަރަހައްދުތަކަށް ހުދު ސަމާލު މެޓް އޮފީހުން ވަނީ ނެރެފައެވެ.
މެޓް އޮފީހުން ހާމަކޮށްފައިވާ ގޮތުގައި ހުކުރު ދުވަހު ބ. އަތޮޅުން ފެށިގެން އައްޑޫ ސިޓީ އާ ހަމަ އަށް ގަޑިއަކު 19 މޭލާއި 22 މޭލާ ދެމެދުގެ ބާރު މިނުމުގައި ވައި ޖެހި ކަނޑުތައް ގަދަވާނެ އެވެ.
