އެފްއޭއެމްގެ ޖެނެރަލް ސެކެއްޓްރީކަންވެސް ކުރައްވާފައިވާ ހާމިދު، ރާއްޖޭގެ ފުޓްބޯޅައިގެ ހާލަތާ މެދު ސިލްސިލާކޮށް ލިޔުއްވާ ރިޕޯޓްތަކުގެ ތެރެއިން އެންމެ ފަހުން ލިޔުއްވި ރިޕޯޓުގައި ވިދާޅުވީ ފުޓްބޯޅަ ރައިޓްސް އައުޓްސޯސްކުރުމަކީ އެފްއޭއެމްގެ ސްޓެޓިއުޓްސްއިން ޖާގަ ދޭ ކަމެއް ކަމަށެވެ. ހާމިދު ވިދާޅުވީ، އެފްއޭއެމްގެ އަސާސީ ގަވައިދުގެ އާޓިކަލް 75 – ރައިޓްސް، މިމާއްދާގެ 2 ވަނަ ނަމްބަރުގައި ބުނަނީ މިފަދަ ރައިޓްސް، ތިންވަނަ ޕާޓީއަކަށް ދޫކުރެވިދާނެކަމަށް ކަމަށެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ނޯމަލައިޒް ކުރުމަށް ފީފާ އިން ނިންމައި، ނޯމަލައިޒޭޝަން ކޮމިޓީއަކާ އެފްއޭއެމް ހަވާލު ކުރީ، މިދިޔަ ޖުލައި މަހުއެވެ. ފީފާއިން، ނޯމަލައިޒޭޝަން ކޮމިޓީއާ ހަވާލުކޮށްފައިވާ މެންޑޭޓުގެ ތެރޭގައި އެފްއޭއެމްގެ އެގްޒެކްޓިވް ކޮމިޓީއެއް އިންތިހާބު، އާ ގާނޫނީ އޮނިގަނޑެއްގެ މައްޗަށް ބިނާކޮށް އިންތިޒާމްކޮށް، ކުރިއަށް ގެންދިއުން ހިމެނެއެވެ. ފީފާ އިން އެފްއޭއެމް ހިންގުން ނޯމަލައިޒް ކުރިއިރު، ނޯމަލައިޒިން ކޮމިޓީގެ މުއްދަތު ކަނޑައަޅާފައި އޮތީ، މިއަހަރުގެ ޖުލައި 31 އަށެވެ. އެކަމަކު، އެ މުއްދަތަށް ކުރަން ހުރި ކަންކަން ނުނިމިއްޖެނަމަ، މުއްދަތު އިތުރުކޮށްދޭނެ އެވެ.
ނޯމަލައިޒޭޝަން ކޮމިޓީގެ ޗެއާމަންކަން ފީފާއިން ހަވާލު ކުރީ ކުރީގެ ކުޅިވަރު ވަޒީރު އަހްމަދު ޒުހޫރުއާއެވެ. ޒުހޫރުގެ އިތުރުން ކޮމިޓީގައި ދެން ހިމެނޭ މެމްބަރުންނަކީ، ފަރީހާ ޝަރީފް، އަހުމަދު މުއިއްޒު، އިސްމާއިލް ސިމަން އަދި އަހްމަދު އަލީ އެވެ.
