މާލޭ ސަރަހައްދަށް ކުރަމުންދާ ވިއްސާރާގެ ސަބަބުން މާލޭގެ ބޮޑުބައެއްގައި ފެންބޮޑުވެ، ގެތަކަށް ފެންވަދެ، ބައެއް ސަރަހައްދުތަކުގެ މަގުތައް ބަންދުކޮށްފައި ވާތީ ގޭބީސީތަކުންނާއި ވިޔާފާރީތަކުން ކުނިނެގުމުގެ ހިދުމަތް ދިނުމުގައި ދަތިތަކެއް ކުރިމަތިވެފައިވާކަން ވެމްކޯއިން ފާހަގަކުރެ އެވެ.
ވެމްކޯއިން ކުނި ނެގުމުގެ ހިދުމަތް ނުދެވި ހުރި ގޭބީސީތަކާއި ކެފޭ ރެސްޓޯރަންޓު ފަދަ ވިޔަފާރީތަކަށް މިއަދު ހެނދުނު 9:00 ފެށިެގން ހިދުމަތް ދެމުންދާނެކަންވެސް އެ ކުންފުނިން ބުނެ އެވެ.
އޭގެއިތުރުން އެކަމުގައި ރައްޔިތުނަށް ކުރިމަތިވެދާނެ ދަތިތަަކަށް އެ ކޯޕަރޭޝަނުން ވަނީ މައާފަށް އެދިފަ އެވެ. އަދި އެފަދަ ކަންކަމުގައި ރައްޔިތުންގެ ފަރާތުން ލިބެމުންދާ އެއްބާރުލުމަށް ވެމްކޯއިން ޝުކުރު އަދާކުރެ އެވެ.
އިއްޔެ ވެހުން ވާރޭގެ ސަބަބުން މާލޭގައި 500 އަށްވުރެ ގިނަ ތަނަކަށް ފެން ވަދެ، 774 ތަނަކުން އެކި ބާވަތުގެ އެހީތެރިކަމަށް އެދިފައިވާކަމަށް އެންޑީއެމްއޭ އިން އާންމުކުރި މައުލޫމާތުގައިވެ އެވެ. މާލޭގެ އިތުރުން އިތުރު 8 ރަށަކަށް ވެސް ވަނީ ބޮޑެތި ގެއްލުންތަކެއް ލިބިފަ އެވެ.
ރާއްޖޭގެ އެހެން ރަށްތަކަށް ބަލާއިރު، އެންމެ ބޮޑު ގެއްލުމެއް ލިބިފައިވަނީ ފ. ނިލަންދޫ އަށެވެ. އެ ރަށުގެ 80 ޕަސަންޓު ސަރަހައްދުގައި ފެންބޮޑުވިއެވެ. ކ. ގުރައިދޫ އާއި ކ. ހިންމަފުށީގައި ވެސް ގިނަ އަދަދެއްގެ ގެތަކަށް ގެއްލުން ލިބުނެވެ.
މިހާރު ރާއްޖެއަށް ކުރަމުންދާ ވިއްސާރައަކީ މި ސަރަހައްދުގައި އުފެދިފައިވާ ކޮޅިގަނޑެއްގެ ސަބަބުން ކުރަމުންދާ ވިއްސާރައްކަމަށާއި ވިއްސާރަ އަލިވާނެކަމަށް ބެލެވެނީ ހޯމަ ދުވަހުގެ ފަހުން ކަމަށް މެޓު އޮފީހުން ބުނެ އެވެ.
