ސޯޝަލް މީޑިއާއިން އާންމުވި ފޮޓޯ ވީޑިއޯތަކުން ފެނިގެންދަނީ ކަންބޮޑުވާވަރުގެ ބިރުވެރި މަންޒަރެކެވެ. ޗައިނާގެ ހޮސްޕިޓަލްތައް ތޮށްޖެހި، މީހުން ކިއުގައި ތިބޭ މަނަޒަރެވެ. އެންމެންވެސް މާސްކްއަޅައިގެން ހާލުދެރަވެފައި ތިބި ކުޑަކުދިންނާއި ބޮޑެތި މީހުން ޑޮކްޓަރަކަށް ދައްކަން އައިސްފައިވާ މަންވަރެވެ.
ފާއިތުވި ދުވަސްތަކުގައި، ޗައިނާގައި ބޮޑު ރޯގާއެއް ފެތުރެމުންދާ ކަމުގެ ރިޕޯޓްތައް ވަނީ ފެތުރިފަ އެވެ. މި ވާހަކަ އެންމެ ބޮޑަށް އުޅެނީ އިންޑިއާ އާއި އިންޑޮނީޝިއާގެ މީޑިއާގަ އެވެ. އަދި މި ރޯގާ އާއި މީގެ ފަސް އަަހަރު ކުރިން ފެތުރު ކޮވިޑާ ގުޅުވައި އެކި ވާހަކަތައް ދަނީ ދެކެވެމުންނެވެ.
ޗައިނާގެ ސެންޓާ ފޯ ޑިޒީސް ކޮންޓްރޯލް އެންޑް ޕްރިވެންޝަންގެ ރަސްމީ ރިޕޯޓްތަކުން ދައްކާ ގޮތުގައި ޗައިނާގައި ފްލޫ ފަދަ ގިނަ ބަލިތަކުގެ ނިސްބަތް އިތުރުވަމުންދާ ކަމަށް 2024 ވަނަ އަހަރުގެ ފަހު ހަފްތާއާ ހަމައަށް ތަފާސް ހިސާބުތަކުން ދައްކަ އެވެ.
އެ ޑޭޓާއިން ހާމަވަނީ އިންފްލުއެންޒާ އެންމެ ކުރީގައި ފެތުރެމުންދާއިރު، 30.2 އިންސައްތައިގެ ޓެސްޓުތައް އެ ބައްޔަށް ޕޮޒިޓިވްވެފައިވާ ކަމެވެ. އަދިި އޭގެ ކުރީ ހަފްތާއާ އަޅާބަލާއިރު 6.2 އިންސައްތަ އިތުރުވެ، ނޭވާލާ ނިޒާމުގެ ސީރިއަސް ބައްޔަކާ ގުޅިގެން ހޮސްޕިޓަލުގައި އެޑްމިޓްކުރި މީހުންގެ ތެރެއިން 17.7 ޕަސެންޓް މީހުން އެ ބައްޔަކަށް ޕޮޒިޓިވްވެފައި ވާކަން ދައްކަ އެވެ.
އެޗްއެމްޕީވީ އަކީ ކޮބާ؟
- ހިއުމަން މެޓަޕްނިއުމޯވައިރަސް (އެޗްއެމްޕީވީ) އަކީ ކުޑަކުދިންނާއި އުމުރުން ދުވަސްވީ މީހުންނާއި ދިފާއީ ނިޒާމު ބަލިކަށިވެފައިވާ މީހުން ހިމެނޭ ގޮތަށް ބައެއް މީހުންނަށް ނުރައްކާ ބޮޑު ނަމަވެސް ހުރިހާ އުމުރެއްގެ މީހުންނަށް ފްލޫ ފަދަ ބަލިތައް ކުރިމަތިވާ ވައިރަހެކެވެ.
- މި ވައިރަސް ފެނުނީ 2001 ވަނަ އަހަރު ނަމަވެސް މިއީ ރެސްޕިރޭޓަރީ ސިންސިޓިއަލް ވައިރަސް (އާރުއެސްވީ) އާއި އެއް އާއިލާއެއްގައި ހިމެނޭ ވައިރަސް: ފްލޫ ފަދަ އެހެން ވައިރަސްއެއް
ފްލޫ ފަދަ އަލާމާތްތައް ހުންނަ މީހުންގެ ތެރޭގައި ވަކި ވައިރަސްތަކަށް ޓެސްޓްކުރުން ގިނައިން ބޭނުންކުރުމުގެ ސަބަބުން ނޭވާލާ ނިޒާމުގެ ބަލިތަކުގެ މުހިންމު ސަބަބެއްގެ ގޮތުގައި އެޗްއެމްޕީވީއަށް ހޭލުންތެރިކަން އިތުރުވެފައިވާކަން ބޭރުގެ ރިޕޯޓްތަކުން ފާހަގަކުރެއެވެ.
އެޗްއެމްޕީވީ ފެތުރެނީ ކިހިނެތް؟
މިފަދަ އެހެން ވައިރަސްތަކެކޭ އެއްފަދައިން އެޗްއެމްޕީވީ އާންމުކޮށް ފެތުރެނީ ކެއްސުމާއި ހޮޑުލުމުގެ ފެތުރޭ ޖަރާސީމު، ގައިގޯޅިވުން، ވައިރަސް ތަގައްޔަރުވެފައިވާ ތަންތަނާއި ތަކެތިގައި އަތްލުމަށްފަހު އަނގަ، ނޭފަތް ނުވަތަ ލޮލުގައި ޖެހުމުންނެވެ.
އެމެރިކާ ފަދަ ބައެއް ގައުމުތަކުގައި އެޗްއެމްޕީވީ މޫސުމީ ގޮތުން ދައުރުވަނީ ފްލޫ އާއި އެފަދަ ބަލިތަކާ އެކު ކަމަށާއި، އެންމެ ބޮޑަށް ބަލި ހަރަކާތްތެރިވަނީ ފިނިމޫސުމުގެ ފަހުކޮޅު އަދި ބަހާރު މޫސުމުގައި ކަމަށް ރިޕޯޓްތަކުން ދައްކައެވެ.
އެޗްއެމްޕީވީ އިން ރައްކާތެރިވާނީ ކިހިނެތް:
- ވައިރަހުން ރައްކާތެރިވުމަށްޓަކައި ގިނަގިނައިން ސައިބޯނި ބޭނުންކޮށްގެން އަތްދޮވުމާއި، ދޮވެނުލާ އަތުން މޫނުގައި އަތްލުމުން ދުރުހެލިވުމާއި، ބަލި މީހުންނާ ކައިރިނުވުން
- ފްލޫ ފަދަ އަލާމާތްތައް ހުންނަ މީހުން ކެއްސާއިރު ނުވަތަ ހޮޑުލާއިރު އަނގަ ނިވާކުރުމާއި، ގިނައިން ސައިބޯނި ލައިގެން އަތް ދޮވުމާއި، އެހެން މީހުން ކާ އުޅޭ ތަށިތަށްޓާއި ކަޓްލަރީ ބޭނުންކުރުމުން ދުރުހެލިވުމާއި، ރަނގަޅުވުވަން ދެން ގޭގައި މަޑުކުރުމަށް ސިއްހީ އިދަރާތަކުން އިލްތިމާސްކުރެއެވެ.
އެޗްއެމްޕީވީގެ އަލާމާތްތަަކަކީ ކޮބާ؟
އެޗްއެމްޕީވީގެ އަލާމާތްތަކަކީ ފްލޫ ފަދަ އެހެން ބަލިތަކާ އެއްގޮތް އަލާމާތްތަކެއް ކަމަށާއި އޭގެ ތެރޭގައި ކެއްސުމާއި ހުމުގެ އިތުރުން ނޭފަތުން އަރަފުސް އައުން ނުވަތަ ލޭއައުން ހިމެނެ އެވެ. އަދި ބައެއް ހާލަތްތަކުގައި ބަލި މީހުންނަށް ނޭވާ ކުރުވުން ކުރިމަތިވެ، ބްރޮންކައިޓިސް އިންފްލެމޭޝަން ނުވަތަ ނިއުމޯނިއާ އަށް ބަދަލުވެދާނެ ކަމަށް ކަމާ ބެހޭ މާހިރުން ބުނެ އެވެ. އޭގެއިތުރުން ބަލީގެ ދިގުމިން ބަރޯސާވެފައިވަނީ ބަލިމީހާގެ ފަރާތުން ފެންނަ އަލާމާތްތަކުގެ ބާރުމިނަށް ނަމަވެސް އާންމުކޮށް ފްލޫ އެއްގެ މުއްދަތާ އަޅާކިޔާލެވެ އެވެ.
އެޗްއެމްޕީވީގެ ސަބަބުން އިތުރު ކޮވިޑް ފަދަ ޕެންޑަމިކް އަކަށް ދާނެ ބާ؟
އެޗްއެމްޕީވީ ހުންނަ މީހުންނަށް ފްލޫ ފަދައިން ފަރުވާ ދިނުމަށާއި ހަށިގަނޑުގައި އިންފެކްޝަނާ ދެކޮޅަށް ފަރުވާދީ ގޭގައި ތިބުމަށް ޑޮކްޓަރުން އިލްތިމާސްކުރެ އެވެ.
މިވަގުތު ޗައިނާގައި އެޗްއެމްޕީވީ ފެތުރިދާނެ މިންވަރާއި ބަލީގެ ވަރުގަދަކަމާ ބެހޭ ގޮތުން އިތުބާރު ހުރި މަސްދަރުތަކުން އެކަށީގެންވާ މައުލޫމާތެއް އަދި ލިބިފައެއް ނުވެ އެވެ.
ޗައިނާގެ ފޮރިން މިނިސްޓްރީން ހުކުރު ދުވަހު ބުނި ގޮތުގައި ހޮސްޕިޓަލްތަކަށް ބާރު ބޮޑުވެފައި ވިޔަސް މިފަހަރު ފިނިމޫސުމުގައި ރޯގާ ޖެހުނު މީހުންގެ އަދަދު ކުރީ އަހަރާ އަޅާބަލާއިރު މަދެވެ.
އެހެންވެ، ޗައިނާއަށް ދަތުރުކުރުމުގައި ނުރައްކަލެއް ނެތް ކަމަށް ފޮރިން މިނިސްޓްރީން ބުންޏެވެ.
މިހާރު ޗައިނާގައި ނޭވާލާ ނިޒާމުގެ ބަލިތައް އިތުރުވެ، އިމަޖެންސީ ހާލަތު ވެސް އިއުލާނުކޮށްފައިވާ ކަމަށް ބައެއް ފަރާތްތަކުން އަންނަނީ ބުނަމުންނެވެ.
އެ ވާހަކަތަކާ ގުޅިގެން އެޗްޕީއޭއިން ބުނީ، ޗައިނާގައި އިމަޖެންސީ ހާލަތު އިއުލާނުކޮށްފައިނުވާ ކަމަށެވެ. އަދި، މިދިޔަ އަހަރާ އަޅައިބަލާއިރު ޗައިނާގައި މި މޫސުމުގައި ނޭވާލާ ނިޒާމުގެ ބަލިތައް ފެންނަ މިންވަރާއި، ބަލީގައި ބޮޑު ވަރުވާ މީހުންގެ ނިސްބަތް މަދު ކަމަށް އެޗްޕީއޭއިން ބުންޏެވެ.
ދުނިޔޭގެ ސިއްޙަތު ޖަމްއިއްޔާއިން، ޗައިނާ ސީޑީސީއާ ހަވާލާ ދެއްވާ މައުލޫމާތު ދެއްވި ގޮތުގައި ޗައިނާގެ އެކި ހިސާބުތަކުގައި ނޮވެމްބަރު މަހުގެ ދެވަނަ ހަފުތާއިން ފެށިގެން ނޭވާލާ ނިޒާމުގެ ބަލިތައް އިތުރުވަމުންދާކަން ވަނީ ފާހަގަކުރެވިފަ އެވެ.
