ގައުމީ ވޮލީބޯޅަ މުބާރާތުގައި ކުޅެނީ ގައުމީ ވޮލީބޯޅަ ލީގުގެ ގަދަ ހަތަރު ޓީމެވެ. މުބާރާތުގެ ފޯމެޓް މި ފަހަރު ރާވާފައިވަނީ ލީގު ބުރެއް ކުޅުމަށް ފަހު، އެއް ވަނަ ޓީމަށް ފައިނަލުގެ ސީދާ ޖާގައެއް ލިބޭއިރު، ދެ ވަނަ އާއި ތިން ވަނަ އަށް ދާ ޓީމުގެ މެދުގައި ސެމީ ފައިނަލް ކުޅެގެން، ފައިނަލްގެ ފަހު ޖާގަ ކަށަވަރުކުރާ ގޮތަށެވެ.
އެންމެ ފަހުގެ ގައުމީ ޗެމްޕިއަން ސިފައިން ބްލޫސް ފޯ ވޮލީބޯލްއާ ކުޅުނު މެޗު ކާމިޔާބު ކުރީ ސީދާ ތިން ސެޓުންނެވެ. އެ ޓީމުން ސެޓުތައް ގެންދިޔައީ، 25-23، 25-15 އަދި 25-21 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ސިފައިން ޓީމުގެ މުހައްމަދު ވަގާރު އެވެ.
ސްޕޯޓްސް ކްލަބް ސިޓީ އާއި އެޗްޑީސީ މެޗު ސީދާ ތިން ސެޓުން ކާމިޔާބުކުރީ އެޗްޑީސީންނެވެ. އެޗްޑީސީން ސެޓުތައް ގެންދިޔައީ 25-21، 25-19 އަދި 25-20 އިންނެވެ. މެޗުގެ މޮޅު ކުޅުންތެރިއަކީ އެޗްޑީސީ ޓީމުގެ މުބައްޝަރު ރަޒާ އެވެ.
